Shkup, 8 shtator 2025 (MIA) - Prioriteti ynë është integrimi evropian, por ajo rrugë nuk duhet të jetë më e turpshme, por dinjitoze, tha kryeministri Hristijan Mickoski në fjalimin e tij të sotëm në ceremoninë me rastin e Ditës së Pavarësisë.

"Prioriteti ynë është integrimi evropian. Ka qenë, është dhe do të mbetet një përparësi kryesore, por kjo rrugë nuk duhet të jetë më e turpshme, duhet të jetë dinjitoze. Duhet të jetë një rrugë në të cilën do të jemi të barabartë me të gjitha kombet e tjera evropiane, dhe jo të poshtëruar dhe të turpëruar siç për fat të keq ndihemi të gjithë ne", tha kryeministri.

Lidhur me propozimin për vija të kuqe në negociatat me Bullgarinë të iniciuara nga kryetari i LSDM-së, Venko Filipçe, Mickoski vuri në dukje se është në pritje të propozimit, duke theksuar se për sa kohë që është kryeministër, nuk do të ketë lojëra me çështje të tilla.

"Po e pres me padurim atë propozim për të parë se si do të jetë. Jam në pritje, po e pres me padurim. Nga të njëjtët që pranuan një deklaratë për mosndryshim emri, dhe pastaj e ndryshuan, nga ata që bërtitën se nuk kishte ultimatume, dhe pastaj sollën propozimin francez, nga ata që thanë "le të bëjmë një referendum", dhe pastaj nuk i njohën rezultatet e tij. Le të shohim se cilat janë ato vija të kuqe, ngjyra e të cilave do të jetë më e zbehtë se ngjyra më e bardhë, sepse nuk mund të flitet në të njëjtën kohë për vija të kuqe dhe të thuhet "gjithçka në tryezë duhet të pranohet, pa kushte". Por ju them, jini të sigurt se për sa kohë që unë jam kryeministër, nuk do të ketë lojëra me çështje të tilla. Shteti do të jetë i sigurt", tha ai.

Ai thekson se fokusi i tij si kryeministër është arsimi evropian, bujq të lumtur, punëtorë me kushte të mira pune, investimet, një standard i mirë jetese.

"Si kryeministër, fokusi im është gjithashtu në një arsim të vërtetë evropian, bujq të rinj të lumtur që qëndrojnë në shtëpi, pensionistë që gëzohen për vitet e tyre më të mira pas gjithçkaje që kanë bërë në jetën e tyre për familjen dhe vendin e tyre, punëtorë që kanë kushte pune të njëjta me kolegët e tyre në Evropë, një ekonomi të fortë, investime, një standard jetese që është më i miri në Ballkan dhe një nga më të mirët në Evropë. Kjo është ëndrra ime dhe ëndrra e brezit tim. Jam i sigurt se secili prej jush do të pajtohet se ia vlen të sakrifikohet për të realizuar këtë ëndërr. Sot, përsëri përballemi me kohë që kërkojnë guxim dhe vendosmëri. Dhe përsëri, duhet të bëjmë zgjedhjen e duhur - zgjedhjen e punës, zgjedhjen e të qenit bashkë, zgjedhjen e së ardhmes që do t'ua lëmë fëmijëve tanë", theksoi kryeministri Mickoski. ls/

Foto: MIA