15:00/ 5 janar/ 2025

Shkup  - Shkupi është në vendin e 23-të sipas ndotjes së ajrit në nivel botëror dhe është i treti për ajrin më të ndotur në Evropë pas Sarajevës e cila është në vendin e 11-të dhe Prishtinës e 20-të, tregon tabela e platformës "Aj kju air". Niveli i grimcave të dëmshme PM të matura në orën 11:30 është 121 njësi, kjo është arsyeja pse të sëmurëve kronikë dhe fëmijëve nuk u rekomandohet të dalin jashtë

Shkup - Inspektorët e Qytetit të Shkupit vazhdojnë me kontrollet e intensifikuara inspektuese në terren 24 orë, me qëllim të uljes së ndotjes së ajrit dhe mbrojtjes së mjedisit. Shqiptohen dënime pa kriter për të gjithë ata që nuk e respektojnë ligjin, ndotin mjedisin jetësor dhe rrezikojnë shëndetin e qytetarëve. Qyteti i Shkupit vitin e kaluar ka shqiptuar gjoba nga 9 deri në 100 mijë euro për persona juridikë dhe gjoba përkatëse ndaj personave fizik, te të cilët është konstatuar se krijojnë deponi ilegale, i djegin dhe e shkelin ligjin, njoftuan sot nga Departamenti për Marrëdhënie me Publikun në qytetin e  Shkupit.

Shkup - Një 22-vjeçar nga Gostivari dyshohet për veprën penale përdhunim i fëmijës nën moshën 15 vjeçare nga neni 188 paragrafi 1 i Kodit Penal, kumtoi Prokuroria Publike e Republikës së  Maqedonisë së Veriut. Prokuroria Themelore Publike në Gostivar, siç thuhet, ka iniciuar hetim për shkak të dyshimit të bazuar se i dyshuari më 2 janar ka detyruar një vajzë 13-vjeçare të kryejë marrëdhënie seksuale.

Shkup - Regjim i posaçëm i komunikacionit do të vendoset nesër në zonën e qytetit të Shkupit, ku do të mbahen disa manifestime me rastin e festës së Buzmit të Krishtlindjes, njofton SPB Shkup. "Njëherit, nga SPB Shkup apelojnë te të gjithë qytetarët pjesëmarrës në komunikacion të respektohen rregullat të cilat do t'i japin nëpunësit policor.

Shkup - Në mëngjes temperatura më e ulët në vend prej -11 gradë Celsius është matur në Kodrën e Diellit, njoftoi DPHM. Pasojnë Berova me -7 gradë, -6 Kriva Pallanka, Shtipi, Demir Kapia, -5 Kavadari, Hanet e Mavrovës, -4 Shkup-Zajçev Rid, Manastiri, Krusheva, -3 Strumica, Tetova, Prilepi, Vinica, -3 Velesi, - 1 Pretori, 2 Ohri dhe 3 gradë në Gjevgjelia.

Shkup - Ulje të dukshmërisë për shkak të paraqitjes së mjegullës nga 80 deri në 100,  ka në qafën malore Gjavatë dhe deri në 50 m në qafën malore Bukovë, njoftoi LAMM. Komunikacioni në afërsi të Bashino Sellës, pranë urës, është ndërprerë plotësisht që prej datës 03.01.2025 dhe do të jetë i ndërprerë për një periudhë më të gjatë.

Strumicë - Mbrëmë në orën 23:30 u dogj një automobil në rrugën Strumicë-Dabile, njoftuan nga NJTZ Strumicë. Sipas informatave të zjarrfikësve, në shuarjen e automobilit të djegur kanë marrë pjesë një automjet i zjarrfikësve dhe pesë zjarrfikës, të cilët kur kanë mbërritur në vendin e zjarrit veçse ishte në fazën e djegies.

Athinë – Në moshën 88-vjeçare, mëngjesin e sotëm ka vdekur papritur ish kryeministri i Greqisë dhe ish lideri i PASOK-ut, Kostas Simitis, i cili e futi vendin në Eurozonë gjatë dy mandateve të tij. Ai ishte edhe kryeministri i parë grek që e vizitoi Shkupin në vitin 2000 për Konferencën e vendeve të Ballkanit, njoftoi korrespondentja e MIA-s nga Athina.

Romë - Kryeministrja italiane, Xhorxha Meloni, mbrëmë vonë ka pasur një takim me presidentin e sapozgjedhur të SHBA-së, Donald Tramp, i cili është mbajtur në pronën Mar a Lago në shtetin e Floridës, njofton agjencia italiane e lajmeve ANSA.  Meloni u nis për në SHBA mbrëmë vonë për të diskutuar, sipas gazetarëve italianë dhe amerikanë, një sërë temash - lufta në Ukrainë, kriza në Lindjen e Mesme, si dhe rasti i gazetares italiane Çeçilia Sala, e cila u arrestua në Teheran më 19 dhjetor dhe u mbajt në qeli në burgun "Evin" pranë kryeqytetit të Iranit.

Berlin - Një pjesë e sirianëve të arratisur në Gjermani mund të urdhërohet të kthehen në atdheun e tyre në kushte të caktuara, tha ministrja e Punëve të Brendshme gjermane, Nensi Fezer, cituar nga DPA. “Siç parashikohet me ligjin tonë, Zyra Federale për Migracionin dhe Refugjatët (BAMF) do të shqyrtojë dhe tërheqë mbrojtjen e dhënë, nëse njerëzit nuk kanë më nevojë për një mbrojtje të tillë në Gjermani, pasi situata në Siri stabilizohet”, tha Fezer.

Vjenë  - Kancelari austriak Karl Nehamer dhe kreu i Partisë Popullore Austriake konservatore (OVP) ka thënë mbrëmë se në ditët në vijim do të japë dorëheqje nga posti i kryeministrit dhe lider i OVP-së, pasi për herë të dytë dështuan negocociatat për formimin e Qeverisë së re.

 Frankfurt - Kushtet e pavolitshme dimërore janë arsyeja e anulimit të 120 fluturimeve për dhe nga aeroporti i Frankfurtit nga gjithsej 1.090 fluturime të planifikuara, njoftoi DPA. Pistat në aeroportin më të madh të Gjermanisë duhet të pastrohen, ndërsa  dukshmëria është ulur, duke kufizuar kapacitetin e aeroportit, deklaroi   zëdhënësi i Drejtorisë së Aeroportit.

Tokio - Autoritetet japoneze bënë të ditur se sot 50.000 zogj janë asgjësuar  pas shpërthimit të gripit të shpendëve në një fermë në veri të vendit. Testet e bëra në një fermë në zonën Ivat konfirmuan praninë e virusit të gripit të shpendëve, thanë autoritetet, duke shtuar se zogjtë u asgjësuan në vendngjarje. 

Tel Aviv - Rreth 1.500 izraelitë janë mbledhur sot në Tel Aviv në protesta javore antiqeveritare, duke kërkuar që presidenti i zgjedhur i SHBA-së, Donald Tramp, t'i japë fund luftës në Rripin e Gazës dhe të mundësojë kthimin e pengjeve izraelitë. Shahar Mor, nipi i pengut të vrarë Avraham Munder, në një fjalim në gjuhën angleze i kërkoi Trampit "të ndërpresë armatimin e fushatës së hakmarrjes në Gaza".

Uashington - Stuhia sot ka goditur  pjesën lindore të SHBA-së, ku miliona njerëz janë të kërcënuar me stuhi të dëborës, ndërsa në disa vende priten reshjet më të mëdha të borës në dhjetë vitet e fundit, bënë të ditur meteorologët amerikanë. Më shumë se 60 milionë njerëz janë në rrugën e stuhisë, e cila pritet të mbulojë gjysmën lindore të SHBA-së me ajër arktik deri nesër dhe të shkaktojë ndërprerje të mëdha të udhëtimeve.

Shkup - Moti sot në mëngjes do të jetë i ftohtë me mjegull në disa lugina. Gjatë ditës me diell me vranësira të ulëta deri në mesatare lokale. Siç njofton DPHM do të fryjë erë e lehtë deri në mesatare nga drejtimi jugor. Temperatura minimale do të jetë në intervalin prej -8 deri në -2 gradë, ndërsa ajo maksimale do të arrijë nga 5 deri në 12 gradë Celsius.