Shkup, 4 nëntor 2024 (MIA) - Zëvendëskryeministri i parë dhe ministri i Mjedisit Jetësor dhe Planifikimit Hapësinor, Izet Mexhiti, së bashku me drejtoreshën e Inspektoratit Shtetëror të Mjedisit, Ivana Ginovska dhe u.d. drejtori i Ndërmarrjes Publike “Drislla” Nenad Josevski ka vizituar deponinë “Drislla”. Gjatë kësaj vizite u diskutua për rëndësinë e investimeve në landfill, me qëllim që ai të jetë plotësisht funksional dhe të ofrojë shërbime më të sigurta dhe më efikase.

Ministri Mexhiti theksoi nevojën e mbylljes së deponisë, para së gjithash për arsye sigurie, dhe kjo do të mundësojë mbrojtjen e mjedisit dhe shëndetit publik. Ai theksoi se investimet e nevojshme do të ndihmojnë në përmirësimin e kushteve të punës dhe do të kontribuojnë në menaxhimin më të mirë të mbetjeve në rajon.

Kjo vizitë theksoi përkushtimin e Qeverisë për përmirësimin e menaxhimit të mbetjeve dhe ofrimin e një mjedisi më të pastër dhe më të shëndetshëm për qytetarët.

“Së pari duhet të kthehet rrethoja e ‘Drislës’, sepse është e rrezikshme dhe e dëmshme për qytetarët, të ndërmerren investime të tjera. Kështu që kemi biseduar në detaje dhe po punojmë së bashku për të gjetur një zgjidhje”, nënvizoi ministri

Josevski, u.d. drejtor i ndërmarrjes, tha se në planin për furnizime publike e kanë rregullimin e rrethojës, rregullimin e stacionit të filtrimit dhe rregullimin e specifikacionit teknik për furnizim të inceratorit për shkatërrimin e mbeturinave medicinale. 

Në pyetjen e gazetarëve, nëse është në plan të vendosen filtra në furrë, sepse kjo ishte ndotja më e madhe, Ginovska sqaroi se në takimin e sotëm, është biseduar që të vendoset furrë e re. 

“Sot folëm edhe për atë që duhet të vendoset një furrë e re, sepse nuk mund të vendosin filtra në atë ekzistuese, përndryshe do ta kishin bërë deri tani. Për shkak se ata nuk mund të instalojnë filtra, ata duhet të marrin një furrë të re. Drejtori na njoftoi se sa kushtojnë furrat e tilla të sofistikuara, prandaj jemi këtu për të parë si Ministri, si Inspektorat se çfarë mund të ndihmojmë financiarisht dhe të fillojmë me modernizimin e kësaj deponie”, theksoi ajo.

Deklaratë për media dha edhe Senih Brahoviq nga fshati Batincë, nga organizata joqeveritare “Vakat” (Koha). Ai foli për problemet e banorëve të Batincës, Sopishtës dhe Draçevës, për të cilët, mes tjerash, tha se jetojnë si “në kontejner”. 

“Shpresojmë se kjo furrë do të ndërrohet, do të vendoset furrë e re me filtra, që të mundet ky popull këtu, të thithë ajër të pastër”, theksoi ai. 

Kërkesat e tyre janë edhe që të bëhet deponi evropiane, që të rrethohet deponia, që të bëhen stacione filtruese që shkojnë në Markova Rekë, sepse lumi ka pësuar, brenda nuk ka peshq, bretkosa. fc/

Foto dhe video: MIA