• e mërkurë, 24 korrik 2024

Me Gerapetritis nuk është hapur tema e emrit

Me Gerapetritis nuk është hapur tema e emrit

Shkup, 13 qershor 2024 (MIA) - Në Samitin e sotëm të vendeve të përfshira në Procesin e Bashkëpunimit në Evropën Juglindore (PBEJ) në Shkup, nuk është diskutuar çështja e përdorimit të emrit kushtetues me ministrin e Punëve të Jashtme të Greqisë, Jorgos Gerapetritis, tha presidentja Gordana Siljanovska në konferencën e përbashkët për shtyp me kolegët e saj nga Shqipëria, Bajram Begaj dhe Mali i Zi, Jakov Millatoviq.

“Tema nuk u hap. Ishim afër njëri-tjetrit. Jam shumë i kënaqur që erdhi. I lamë hapësirë që të fliste i fundit për shkak të vonimit të aeroplanit të tij. Mesazhet e tij ishin me ngjyra rajonale, se ne duhet të ndihmojmë njëri-tjetrin, të ndërtojmë shtetin e së drejtës, të respektojmë të drejtën ndërkombëtare, se duhet të vazhdojmë aty ku ka pasur përcaktime shumë të qarta në samitin e Selanikut. Këto ishin bisedat. Mendoj se atmosfera ishte e këndshme, miqësore, aty ishte edhe zëvendësministri i Punëve të Jashtme, me të cilin njihemi. Më pëlqen që njerëzit nga Ballkani mund ta kuptojnë njëri-tjetrin kur është e nevojshme. Jam shumë e kënaqur, veçanërisht për shkak të deklaratës plotësisht të harmonizuar që është miratuar”, tha Siljanovska Davkova.

E pyetur nëse pret që nëse do të vazhdojë praktikën e përdorimit të emrit të shtetit, të ketë bllokadë nga Greqia dhe tërheqje të mbështetjes për anëtarësim në BE, si dhe mundësisht pasoja të tjera, presidentja tha se “nuk mendon se e shkel Kushtetutën dhe se mospërdorimi i emrit kushtetues mund të shkaktojë probleme”.

“Më lejoni t'ju kujtoj, dokumentet e mia, ato që firmos, ato që kam, pasaporta, letërnjoftimi, të gjitha dokumentet që dalin nga zyra mbajnë emrin kushtetues. Është në kuadrin e së drejtës ndërkombëtare dhe në kuadrin e Kushtetutës. Është e vërtetë që çdo deklaratë e njerëzve në politikë, e atyre në detyrë, interpretohet sikur të ishte një akt zyrtar, por secili prej nesh ka, si jin jang, dy personalitete, një zyrtar dhe një tjetër. Unë si njeri kam të drejtë, e përsëris që nga Sokrati e deri më sot, në kuadrin e lirisë dhe të mendimit, shprehjes së lirë të mendimit, të shprehem ashtu siç shprehem dhe nuk mendoj se kjo është shkelje as e Kushtetutës dhe as e së drejtës ndërkombëtare”, theksoi Siljanovska Davkova.

Edhe presidenti i Shqipërisë, Bajram Begaj, nuk pret pengesa dhe bllokada nga Greqia. Ai beson se fqinjët tashmë anëtarë të BE-së duhet të ndihmojnë Shqipërinë dhe Maqedoninë e Veriut që të bëhen pjesë e klubit, aq më tepër që të dyja vendet bënë shumë sakrifica për t'u bërë pjesë e familjes evropiane.

“Ne presim që çështjet dypalëshe të mos jenë pengesë për vendet dhe popujt që presin prej 30 vitesh të bëhen pjesë e BE-së. Ne respektojmë të gjitha rregullat e klubit ku duam të anëtarësohemi. Ne jemi plotësisht të lidhur me politikën e jashtme të BE-së. Shpresoj se e gjithë kjo do të kontribuojë që vendet tona, Shqipëria dhe Maqedonia e Veriut, që bënë shumë sakrifica, të jenë pjesë e komunitetit evropian”, theksoi Begaj.

Фото/виде: МИА

 

   

QËNDRONI TË LIDHUR