Shkup, 13 shkurt 2026 (MIA) - Në seancën e sotme për rastin “Onkologji”, ekspertja nga Sllovenia, Maja Ravnik, u përgjigj një serie pyetjesh të kryqëzuara nga mbrojtja e të akuzuarve, duke sqaruar se gjetjet e saj profesionale janë përgatitur ekskluzivisht bazuar në dokumentacionin mjekësor të dorëzuar dhe protokollet ndërkombëtare onkologjike. Ajo theksoi se kishte konsideruar se dispononte dokumentacion të plotë për çdo pacient dhe se opinionet e saj profesionale i bazonte mbi të dhënat që formalisht i ishin dorëzuar nga organet kompetente. Mbrojtja, nga ana tjetër, përpiqej të tregonte se Ravnik kishte punuar mbi dokumentacion ndoshta të paplotë dhe pa marrë parasysh protokollet kombëtare dhe kushtet reale në sistemin shëndetësor të Maqedonisë së Veriut.

Dëshmitari nga Sllovenia, në ditën e dytë për më shumë se shtatë orë u përgjigj në pyetjet e kryqëzuara nga mbrojtja. "Opinionet e mia në ekspertizë bazohen në dokumentacionin mjekësor të dorëzuar dhe protokollet evropiane dhe botërore për trajtim. Opinionin tim nuk e ndryshoj", ishte përgjigja më e zakonshme e ekspertes Maja Ravnik nga Fakulteti i Mjekësisë, Maribor.

Në pyetjet e kryqëzuara nga mbrojtja e të akuzuarës së dytë, Simonida Cërvenkova, lidhur me faktin që kishte dhënë opinion profesional mbi trajtimin e disa pacientëve ekskluzivisht bazuar në dokumentacionin mjekësor të dorëzuar nga prokurori kompetent, dhe nëse kishte kërkuar që t’i dorëzohej dokumentacioni i plotë për trajtimin e pacientëve, ajo u përgjigj se kishte konsideruar se i ishte dorëzuar dokumentacioni i plotë.

"Për të gjithë dokumentacionin, gjegjësisht për të gjitha rastet, kërkova dokumentacionin origjinal për të pasur qasje në të gjitha dokumentet, të cilët ishin tek secili pacient në dosje. Mendoj dhe supozoj se më është dorëzuar i gjithë dokumentacioni nga dega ku ishte trajtuar pacienti, dhe bazuar në atë dokumentacion mendoj se mund të jap opinion profesional", deklaroi dëshmitari.

E pyetur nëse kishte parasysh që Cërvenkova vepronte sipas protokolleve të vlefshme të Ministrisë së Shëndetësisë së Maqedonisë për atë periudhë, ekspertja u përgjigj se ishte bazuar në protokollet e komunitetit profesional onkologjik evropian dhe botëror.

"Siç është thënë deri më tani gjatë publikimit, rekomandimet kombëtare lidhen me protokollet evropiane dhe botërore, dhe nëse medikamentet nuk janë të indikueshme për një pjesë të caktuar të trajtimit, këtë nuk mund ta anashkalojnë as rekomandimet kombëtare. U bazova në protokollet e komunitetit profesional onkologjik evropian dhe botëror. Siç më është theksuar tani, duket qartë se protokollet në Maqedoni gjatë dhjetë viteve të fundit nuk janë përditësuar", tha dëshmitari.

Rasti është në procedurë dëshmuese dhe e udhëheq gjyqtarja Snezhana Markovska, ndërsa përfaqësuese e akuzës është prokurorja publike Ana Gogovska Jakimovska.

Në pajtim me dinamikën e njoftuar, kah fundi i marsit duhet të fillojë me dëgjimin e ekspertëve nga Serbia, të cilët gjithashtu kanë punuar në ekspertizën mjekësore për Prokurorinë.

Ish drejtori i Klinikën për Onkologji, Nino Vasev, dhe dy onkologë tjerë - Simonida Crvenkova dhe Dragan Jakimovski, të punësuar në Klinikën për Radioterapi dhe Onkologji - Shkup, akuzohen për trajtim joadekuat të pacientëve. Procedura filloi edhe kundër një onkologu tjetër, e pandehura e dytë Meri Peshevska, e cila pranoi fajin dhe gjykata e dënoi me dy vjet dënim me kusht me burg.

Aktakuza i ngarkon mjekët për vepra të vazhduara penale kundër shëndetit të njerëzve dhe trajtim joadekuat, me ç'rast te 29 pacientë janë aplikuar terapi të papërshtatshme, me devijime në dozë dhe pa vlerësim adekuat të gjendjes shëndetësore. Përveç kësaj, kundër Vasevit dhe ish drejtorit ekonomik të Klinikës është ngritur edhe një aktakuzë për keqpërdorim të pozitës zyrtare dhe për manovra, me dëm prej mbi 2,2 milionë denarë në buxhetin shtetëror. qa/

Foto: Arkivi i MIA-s