Strumicë, 1 shtator 2023 (MIA) - Të jeni të sigurt se në vitin 2030 do të jemi anëtare e BE-së. Këto ditë na pyesin pse nxitojmë aq shumë? Pse insistoni që këtë vit duhet të merren vendime të vështira? Pse reforma, pse tani? Kemi kohë të presim. Do të presim kohë më të mira, do të dobësohet pozita e disa vendeve të tjera që mendojmë se janë pengesë, do të forcohet pozita jonë. Unë ju them atyre se në vitin 2030 do të ketë pranim të anëtarëve të rinj në BE. Në një skenë të tillë do të qëndrojnë përfaqësuesit e Ukrainës, Moldavisë, Serbisë, Malit të Zi dhe Shqipërisë. Do të bëjmë gjithçka që në atë skenë të qëndrojnë edhe përfaqësuesit e atdheut tonë. Çfarë do t'u themi të rinjve nëse nuk ndalojmë këtu në vitin 2030? Si do t'u shpjegojmë atyre që këtë vit nuk ishim të përgatitur të merrnim vendime për ata që në vitin 2030 që të kenë pasaportë evropiane.

Këtë e theksoi zëvendëskryeministri për Çështje evropiane, Bojan Mariçiq në Tribunën e hapur në kuadër të fushatës “Ne jemi Evropë” të Sekretariatit për Çështje evropiane që u mbajt sonte në Strumicë.

Sipas tij, vendi ynë ndan shumë vlera me Bashkimin Evropian dhe prandaj vendosmëria për t'u anëtarësuar në BE është një vendosmëri për të ruajtur stabilitetin, prosperitetin, bashkëpunimin dhe suksesin.
"Pas një kohe të gjatë, agjenda dhe perspektiva evropiane nuk është thjesht ëndërr, por realitet. Ne morëm një afat kohor se në vitin 2030 është vërtet e mundur të bëhemi anëtare e BE-së. Duke pritur çdo ditë humbim një mundësi, çdo ditë jashtë Bashkimit Evropian njerëzit tanë kanë më pak mundësi", ka thënë Mariçiqi.

Ministrja e Punës dhe Politikës Sociale, Jovanka Trençevska në fjalimin e saj tha se në vend po zbatohen shumë praktika dhe zgjidhje evropiane, e njëra prej tyre është garancia për të rinjtë e cila zbatohet që nga viti 2018, si dhe shtesa për të rinjtë për ata të cilët dëshirojnë që pas përfundimit të shkollimit të përfshihen në procesin e prodhimit.

"Masa e vetëpunësimit është gjithashtu një masë evropiane e miratuar në vendin tonë. 44 për qind e shfrytëzuesve të masës janë pikërisht të rinjtë. Propozim- ligji për marrëdhënie të punës bart vlera evropiane. Puna nga shtëpia dhe nga distanca është ajo që duan të rinjtë dhe do të mundësohet me këtë ligj", theksoi Trençevska.

Kryetari i Komunës së Strumicës, Kostadin Kostadinov tha se nuk ka vend më të mirë për të folur për Bashkimin Evropian se sa komuna që ndan ngjyrat me të.

"Strumica është shembulli që duhet ndjekur. Është vlerë evropiane të ofrohen mundësi të barabarta për të gjithë qytetarët. Ne këtë e bëjmë në të gjitha fushat dhe më së shumti në sferën e mbrojtjes sociale", tha kryetari i Komunës së Strumicës.

Karvani "Ne jemi Evropë" pas Strumicës do të vazhdojë në Manastir.

Foto: MIA