Gjenevë, 25 tetor 2022 (MIA) – Më shumë se 29 mijë emigrantë kanë vdekur në përpjekje për të arritur në Evropë që nga viti 2014, ndërsa pesë mijë janë zhdukur vetëm në dy vitet e fundit, njoftoi sot Organizata Ndërkombëtare për Migrim (IOM). Agjencia e OKB-së paralajmëron në raportin e sotëm për "një numër në rritje të vdekjeve në rrugët e Mesdheut dhe në kufijtë tokësorë me Evropën dhe brenda kontinentit". Sipas raportit, rruga më vdekjeprurëse e migrimit mbetet në pjesën qendrore të Detit Mesdhe ku 2.836 emigrantë dhe refugjatë kanë vdekur që nga janari 2021. Ata u përpoqën të shkonin në Itali ose Maltë, dhe nga deti filluan kryesisht nga Libia dhe Tunizia. Hulumtuesit e pranojnë se numri i vdekjeve është ndoshta më i lartë se sa theksohet. bs/