Tetovë, 2 dhjetor 2024 (MIA) - Nga Komuna e Tetovës informojnë se kryetari Bilall Kasami, sot zhvilloi një takim të frytshëm me udhëheqësit e rinj të Sektorit për Punë të Brendshme (SPB) në Tetovë dhe stacionet policore me fokus në forcimin e bashkëpunimit ndërinstitucional kur bëhet fjalë për rregullimin e trafikut dhe parandalimin e përdorimit të mjeteve piroteknike.

"Në takim u diskutuan një sërë çështjesh prioritare, përfshirë rregullimin e trafikut dhe kaosit në qytet, me theks në lirimin e hapësirave të zëna në mënyrë të paligjshme për parkim, eliminimin e parkingjeve të dyfishta dhe ndalimin e parkimeve në vendet ku ka stacione autobusi apo pranë kontenjerëve të mbeturinave. Po ashtu, u shqyrtua gjetja e zgjidhjeve për pikat kritike të trafikut, ku shpesh krijohen bllokime dhe vonesa, duke u fokusuar në riorganizimin e bulevardeve dhe rrugëve kryesore. Një tjetër temë e rëndësishme ishte rritja e sigurisë në shkollat fillore dhe të mesme përmes masave shtesë mbikëqyrjeje dhe koordinimi. Për fund, u vendos që të merren masa parandaluese ndaj përdorimit të mjeteve piroteknike, për të siguruar një ambient të qetë dhe të sigurt për qytetarët në periudhën festive të fundvitit", thuhet në kumtesën e Komunës së Tetovës.

Kryetari Kasami theksoi rëndësinë e një bashkëpunimi të qëndrueshëm me SPB Tetovë për t’iu përgjigjur nevojave të përditshme të qytetarëve.

Kasami ka biseduar me Rijat Alji, kryeshef i SPB Tetovë, Dalibor Stojanovski, zëvendës shef i SPB Tetovë, Sinisha Jankovski, shef i Departamentit të Policisë së Uniformuar, Muhamed Ademi, komandant i SP PP Tetovë, dhe Miroslav Dimitrievski, komandant i SP për Siguri në Komunikacionin Rrugor-Tetovë. 

Kryetari Kasami theksoi rëndësinë e një bashkëpunimi të qëndrueshëm me SPB Tetovë për t’iu përgjigjur nevojave të përditshme të qytetarëve.

“Ndryshimet në strukturat udhëheqëse të SPB Tetovë janë një mundësi për një qasje të re, më dinamike dhe më efektive. Ne jemi të përkushtuar që së bashku të adresojmë çdo sfidë dhe të garantojmë rend, siguri dhe mirëqenie për Tetovën tonë,” u shpreh kryetari Kasami.

Komuna e Tetovës dhe SPB Tetovë do të vijojnë bashkëpunimin për të sjellë zgjidhje të qëndrueshme dhe për të përmirësuar cilësinë e jetës për qytetarët. fc/

Fotografia: MIA