Gostivar, 10 nëntor 2025 (MIA) - Kryetari i përkohshëm i komunës së Gostivarit dhe kandidati që mori më shumë vota në rrethin e parë të zgjedhjeve lokale, Valbon Limani, vlerëson se emërimi i një "administratori qeveritar" është jokushtetues. Në përgjigje të pyetjes së një gazetari në lidhje me njoftimet për shkarkimin e tij, ai vlerëson se Gjykata Kushtetuese duhet ta zgjidhë çështjen se kush do ta udhëheqë Gostivarin deri në përsëritjen e zgjedhjeve që dështuan për shkak të pjesëmarrjes së ulët.

"Unë jam zgjedhur si u.d. kryetar i komunës vitin e kaluar, në korrik, sipas Ligjit për vetëqeverisje lokale, Neni 54 dhe pastaj Neni 4 i cili u ndryshua në ndërkohë dhe i cili thotë se kam mandat deri në zgjedhjen e kryetarit të ri të komunës", thotë Limani dhe sqaron se fuqishëm beson në shtetin juridik dhe do ta kundërshtojë ligjërisht qëllimin qeveritar për të emëruar një administrator qeveritar në Gostivar.

"Do të paraqesim një nismë në Gjykatën Kushtetuese, pavarësisht nëse është kushtetuese apo jo. Mendoj se në fund të fundit, qytetarët e kanë thënë fjalën e tyre në zgjedhjet e 19 tetorit. Sipas ligjit, duhet të kemi zgjedhje të përsëritura brenda gjashtëdhjetë ditësh më së voni dhe qytetarët e Gostivarit do ta kenë fjalën e fundit. Në fund, besoj se Gjykata Kushtetuese do të thotë nëse është e ligjshme apo e paligjshme, tha u.d. kryetari i komunës së Gostivarit. sa/

Foto: MIA