Shkup, 11 gusht 2023 (MIA)- Kryeministri i Kosovës, Allbin Kurti sot ka vizituar Komunën e Çairit, ku  bashkë me kryetarin e komunës Visar Ganiun dhe deputetin e nismëtarin e Partisë Politike Lëvizja Demokratike, Izet Mexhitin kanë bërë promovimin e rrugës “Adem Demaçi”. Qindra qytetarë morën pjesë në pritjen e Kurtit dhe promovimin e rrugës, sikurse edhe familjarë të Adem Demaçit, kori diplomatik, kryetari i Lëvizjes Besa dhe kryetar i Komunës së Tetovës, Bilall Kasami, deputeti dhe kryetari i Alternativës Afrim Gashi.

Kryeministri i Kosovës Albin Kurti vuri në dukje se në Kosovë ka disa rrugë që e mbajnë emrin Adem Demaçi, por emërtimi i një rruge këtu në Maqedoninë e Veriut në Komunën e Çairit ka një rëndësi të veçantë.

“Gazetari dhe intelektuali, shkrimtari dhe veprimtari Adem Demaçi me veprimtarinë dhe shkrimet e tij sekrete dhe publike që i kushtuan 28 vjet burg u bë simbol i rezistencës kundër shtypjes dhe shfrytëzimit dhe luftës së vazhdueshme për lirinë e shqiptarëve në ish Jugosllavi. Prandaj emri i Adem Demaçit, përveç emrit si personalitet, ishte edhe emër i figurës, një parullë në vete si “Rroftë Adem Demaçi” në demonstratat e viteve 1968, 1981 dhe 1989”, tha Kurti.

“Sot po lëmë edhe një gjurmë historike për të gjithë shqiptarët ngado që janë dhe konkretisht nga Shkupi ynë. Këtu pranë memorialit të UÇK-së, gjegjësisht pranë Shqiponjës dhe në zemër të Çairit, së bashku, shqiptarët nga të gjitha trojet jemi mbledhur dhe po e jetësojmë veprën e një njeriu gjigant, me veprat e të cilit u kalitëm e jetuam dhe sot po mundohemi që të njëjtat ti bëjmë pjesë e përhershme e memories sonë kolektive kombëtare”, tha nga ana tjetër në fjalimin e tij kreu i Çairit, Visar Ganiu.

Ai më tej përkujtoi se Adem Demaçi, ishte luftëtari simbol për lirinë dhe pavarësinë e Kosovës, njëri ndër themeltarët kolosal të shtetësisë së Kosovës, emblema politike e UÇK - së, njeriu vetëmohues i betejave paqësore dhe luftarake, por dhe i penës. Ai i cili deri në frymën e fundit jetoi që shqiptarët kudo që janë të jenë të lirë, njeriu i cili nuk e kurseu veten, duke bërë burgun me kohëzgjatje më të madhe që shqiptarët të shijojnë dritën e lirisë. Ganiu gjithashtu tha se Adem Demaçi edhe sot këtu ku jemi po i bashkon shqiptarët, nga këtu po përçon porosinë se ai ishte dhe mbeti figurë unike e unifikuese. “Dhe emri i Bacës Adem, frymëzimi i brazave të sakrificës sot prore qëndron në Shkupin e Vjetër bashkë me Ibrahim Rugovën, Ismail Qemalin, Ukshin Hotin, Nexhib Dragën, Sulë Hotlën, Jusuf Gërvallën, sikurse edhe me shumë emra të tjerë të historisë sonë të ndritshme që po i jetësojmë në formën e emrave të rrugëve e bulevardeve, proces që e filloi kryetari i parë i Shkupit të Vjetër Izet Mexhiti dhe e vazhduam së bashku”, tha Ganiu.

Ai gjithashtu tha se Adem Demaçi 30 vite më parë kishte qëndruar tek familja Toska për ditë me radhë, menjëherë pas mbajtjes së grevës së urisë që së bashku me një grup gazetarësh dhe intelektualësh në Kosovë e kishin mbajtur për të mbrojtur fjalën e lirë, pas veprimeve që ndërmerrte politika e Millosheviqit për të heshtur lirinë e fjalës në Kosovë, duke mbyllur të gjitha mediat shqipe dhe gjatë qëndrimit të tij në Shkup, kjo ishte rruga e tij e preferuar, në të cilën shëtiste mbrëmjeve së bashku me mikun e tij Ilmi Toska.

Ganiu në fund ju falënderuar kryeministrit Kurti me fjalët: “Juve kryeministër që në fakt ishit edhe dora e djathtë e veprimtarit tonë Adem Demaçi, ju faleminderit që na nderuat me praninë tuaj sot. Populli thotë që i nderuari di të të nderojë më së miri, pikërisht ju e bëtë një gjë të tillë, e nderuat Shkupin dardan, e nderuat Çairin, na nderuat gjithë shqiptarëve dhe nderin e respektin e keni pa fund edhe nga të gjithë ne”. 

Të pranishmëve ju drejtua edhe mbesa e Adem Demaçit, Fitore Shaini e cila tha se ka ardhur këtu sot këtu për të përfaqësuar dajën e tij të ndjerë dhe falënderoj qytetarët e Shkupit që kanë marrë një hap të tillë, “rreth një punë të madhe dhe të riemërtohet një rrugë me emrin e Adem Demaçit”.