Kovaçevski - Kalas: Bashkëpunimi me Estoninë për transformimin digjital është me një rëndësi të madhe për forcimin e sigurisë kibernetike të Maqedonisë së Veriut
Munih, 18 shkurt 2023 (MIA) - Me rëndësi të madhe për Maqedoninë e Veriut është mbështetja nga Estonia në transferimin e përvojës dhe njohurive të saj në transformimin digjital, që pritet të rezultojë me zhvillim të shpejtë të shërbimeve elektronike, të cilat i siguron administrata publike në vend, u potencua sot në takimin në Munih të kryeministrit Dimitar Kovaçevski dhe kryeministres së Estonisë, Kaja Kalas.
Në takimin, i cili u mbajt në margjinat e Konferencës së 59-të të Sigurisë në Munih, mori pjesë edhe zëvendëskryeministri për Çështje Evropiane, Bojan Mariçiq.
Kovaçevski në takimin me Kalasin i shprehu falënderim qeverisë së Estonisë për mbështetjen e fuqishme dhe të zëshme për integrimin e Maqedonisë së Veriut në Bashkimin Evropian.
Dy kryeministrat, bëri të ditur Qeveria, theksuan se Maqedonia e Veriut dhe Estonia, si vende aleate në NATO, do të vazhdojnë edhe më tej të japin kontribut aktiv në Aleancë në drejtim të ruajtjes së paqes dhe sigurisë në kontinentin evropian.
Kovaçevski e ftoi kryeministren Kalas ta vizitojë Maqedoninë e Veriut. ar/
