Bruksel, 12 dhjetor 2023 (MIA) - Procesi i negociatave për anëtarësim të Ukrainës me BE-në nuk është e mundur të përjashtohet nga kandidaturat për anëtarësim të vendeve të Ballkanit Perëndimor, sepse të gjitha proceset e zgjerimit duhet të vlerësohen sipas arritjeve dhe sipas vlerësimit që e jep Komisioni Evropian, deklaroi kryeministri portugez Antonio Koshta.

“Për sa i përket vendeve të Ballkanit Perëndimor, ne besojmë se është e nevojshme dhe e mundur të bëhen hapa përpara në drejtim të procesit të zgjerimit”, tha Koshta.

Ai shtoi se Portugalia "ka një avantazh të madh" në dialogun me vendet e Ballkanit Perëndimor, për shkak të distancës së saj gjeografike dhe arsyeve historike dhe kulturore dhe sepse "nuk është kumbari i asnjë prej vendeve" të rajonit dhe për shkak se i sheh të gjitha "me objektivitet të barabartë".

“Dhe kështu, ne mund të jemi partnerë të ndershëm në identifikimin e problemeve, por edhe në dhënien e mbështetjes politike, teknike dhe financiare që të përpiqemi t'i kalojmë ato probleme”, shtoi Koshta.

Sipas tij, një nga temat kryesore të Samitit të ardhshëm të BE-së, i cili do të mbahet të enjten dhe të premten në Bruksel, do të jetë zgjerimi i Unionit, çështje për të cilën qëndrimi i qeverisë portugeze “është mjaft i qartë”.

"Nëse Komisioni Evropian konsideron se duhet të bëhet një hap i ri drejt hapjes së negociatave me Ukrainën, Portugalia do të shoqërojë Komisionin Evropian dhe do të mbështesë përparimin në procesin e integrimit evropian të Ukrainës", tha Koshta.

Ai shtoi se ai pret që Samiti të jetë "i gjatë dhe i vështirë" dhe se "me shumë gjasa nuk do të përfundojë të premten", por megjithatë shprehu shpresën se mbledhja do të rezultojë me "përkushtim nga ana e BE-së ndaj pritjeve që ka krijuar për Ukrainën dhe për vendet e Ballkanit Perëndimor”.

“Ky është rezultat i një imperativi politik dhe moral, por edhe i një leximi korrekt të sfidave gjeopolitike me të cilat përballet BE-ja”, përfundoi Koshta.

Ndryshe, siç njoftoi  korrespondenti i MIA-s nga Brukseli, çështja e zgjerimit është një nga temat kryesore në mbledhjen e sotme të Këshillit për Çështje të Përgjithshme të BE-së, ku pritet të miratohen konkluzionet lidhur me këtë proces, duke përfshirë vazhdimin e negociatave për anëtarësim me Maqedoninë e Veriut dhe Shqipërinë, të cilat më pas do t'u dorëzohen liderëve të vendeve anëtare të Unionit në Samitin e ardhshëm. ls/

Foto: Iks