Prishtinë, 16 prill 2024 (MIA) - Kryetari i Kuvendit të Kosovës, Glauk Konjufca shfaqi optimizëm se sot në Asamblenë parlamentare të Këshillit të Evropës, Kosova do ta kalojë hapin e dytë për anëtarësim në Këshill, që më tej të shkojë në të fundit, më 16 maj të këtij viti, lajmëroi korrespondenti i MIA-s nga Prishtina.

Në deklaratë për mediumet pas fjalimit në Forumin ndërkombëtar për gratë, paqen dhe sigurinë, Konjufca tha se është e padrejtë të imponohen kushte shtesë për anëtarësimin në KE.

"Sot jam shumë optimist që Kosova do ta kalojë këtë hap të dytë sepse pastaj mbetet vetëm hapi i tretë. Sa i përket kushteve që i keni dëgjuar ju si raportim, nuk mendoj se ato janë përfshirë në raportin e zonjës Bakoyannis, dhe nuk është e ndershme për Kosovën të përballet me kushte shtesë përveç atyre që mund t’i lexoni vetë në raportin e ekspertëve të Këshillit të Evropës," tha Konjufca. Sipas tij, ekspertë të dalluar të Këshillit të Evropës janë mandatuar të vijnë në Kosovë dhe të vlerësojnë nivelet e demokracisë, të drejtave të njeriut dhe sundimit të ligjit—të cilat janë shtyllat kryesore të Këshillit të Evropës", tha Konjufca.

Ai shtoi se Bakojani, në raportin e saj, ka theksuar se ka vetëm një kriter për Kosovën, dhe ai ishte çështja e Manastirit të Deçanit, të cilën Kosova e ka zgjidhur si çështje.

Konjufca pohoi se do të ishte e papranueshme nëse qeveritë e shteteve të tjera do të donin të vendosnin kushte shtesë, duke e cilësuar këtë si një dëmtim të qëllimshëm të Kosovës.

"Pas raportimit nga ekspertët e dalluar, të cilët kanë paraqitur situatën në Kosovë, zonja Bakojani ndërtoi raportin e saj që pohon se Kosova përmbush vetëm një kriter të lidhur me anëtarësimin dhe ky kriter është Manastiri i Deçanit që ne e kemi zgjidhur. Shtetet e tjera, nëse dëshirojnë të vendosin kushte shtesë, kjo do të ishte totalisht e papranueshme dhe do të përbënte dëmtim të qëllimshëm të interesave të Kosovës dhe nuk është fare e mirëpritur kur vetë Këshilli i Evropës dhe zonja Bakoyannis, e cila vjen nga një shtet që nuk e njeh Kosovën, thonë se vetëm manastiri është kushti," u shpreh Konjufca.

Konjufca përmendi se Asociacioni nuk është kusht për anëtarësim në këtë organizatë dhe se kjo nuk është përmendur as në raportin e Bakojani.

"Tani unë po them se Kosova do të mbështetet vetëm në atë që është shënuar në raportin e zonjës Bakoyannis. Raporti nuk përmend asgjë për Asociacionin para anëtarësimit. Pas anëtarësimit, Këshilli i Evropës ka thënë se do të formojë një komision monitorues për Kosovën për të vlerësuar zbatimin e hapave të mëparshëm në implementimin e marrëveshjeve ekzistuese, një prej të cilave mund të jetë edhe Asociacioni," theksoi Konjufca. ab/