Bruksel, 12 shkurt 2024 (MIA) – Në kushte të  rritjes së nevojave për ndihma humanitare në mbarë botën, për të cilat vlerësohet se nevojiten gati 300 milionë njerëz, Komisioni Evropian ka miratuar buxhetin fillestar vjetor humanitar prej më shumë se 1.8 miliardë euro për  këtë vit, ka bërë të ditur sot zëdhënësi i KE-së për ndihmë humanitare dhe menaxhim të krizave, Balash Ujvari.

Nga këto mjete, siç raporton korrespondenti i MIA-s nga Brukseli, rreth 115 milionë euro do të drejtohen për Evropën Juglindore dhe për fqinjësinë evropiane, para së gjithash për trajtimin e pasojave të agresionit rus kundër Ukrainës, si dhe për financimin e projekteve për nevojat aktuale të vendeve të Ballkanit Perëndimor dhe rajonit të Kaukazit dhe për të kapërcyer efektet e tërmeteve të vitit të kaluar në Siri dhe Turqi.

Ujvari njoftoi se nga ndihma totale humanitare e Komisionit Evropian në vitin 2024, gati 470 milionë euro do të ndahen për Lindjen e Mesme dhe Afrikën e Veriut për të mbuluar nevojat ekstreme humanitare në Gazë, për civilët palestinezë, si dhe për nevojat që lidhen me konfliktet në Siri, në Liban, në Jemen dhe në vendet fqinje.

“Pothuajse 200 milionë euro janë të destinuara për të trajtuar pasojat e zhvendosjes së detyruar, mungesës së ushqimit, kequshqyerjes akute dhe kronike, rreziqeve natyrore dhe epidemive në Sahel - Burkina Faso, Mali, Mauritania dhe Nigeri, në Republikën e Afrikës Qendrore dhe pellgun e Liqenit Çad - Çadi, në Kamerun dhe Nigeri, të cilat ushqehen nga konfliktet, pasiguria dhe ndryshimet klimatike”, theksoi Ujvari.

Përveç kësaj, rreth 346 milionë euro do të ndahen për të mbështetur njerëzit e prekur nga konfliktet e armatosura afatgjata dhe kushtet ekstreme të motit në Afrikën Lindore dhe Jugore, duke përfshirë Sudanin, Sudanin Jugor, Ugandën, Madagaskarin, Mozambikun, Xhibutin, Etiopinë, Kenian dhe Somalinë.

Një ndihmë humanitare prej 186 milionë eurosh do të ndahen për të ndihmuar popullatat më të cenueshme në Azinë Jugore dhe Paqësorin, duke synuar kryesisht reagimin humanitar në Mianmar, Bangladesh dhe Filipine, si ndikim i ndryshimeve klimatike në rajon.

Gjithsej 111.6 milionë euro do të ndahen për Amerikën Qendrore dhe Jugore dhe Karaibe, si përgjigje ndaj ndikimit të krizave në Venezuelë dhe Haiti, pasojave humanitare të konfliktit të armatosur në Kolumbi, si dhe dhunës në Amerikën Qendrore, Meksikë dhe Ekuador dhe rreziqet e shpeshta natyrore.

Rreth 315 milionë euro janë rezervuar për t'iu përgjigjur emergjencave dhe krizave të paparashikuara humanitare që mund të shfaqen gjatë vitit, ndërsa mbi 98 milionë euro do t'i dedikohen aktiviteteve, projekteve inovative dhe nismave politike, si për shembull, partneritetet programore shumëvjeçare dhe rritjes së kapacitetit të reagimit.

Lidhur me vendimin, komisioneri për menaxhimin e krizave, Janez Lenarçiq, bëri me dije se Komisioni Evropian do të vazhdojë të financojë aksionet humanitare për të mbështetur kategoritë më të rrezikuara të njerëzve, pavarësisht se ku ndodhen në botë.

“Siç hyjmë në vitin 2024, hendeku midis nevojave humanitare dhe burimeve të disponueshme vazhdon të zgjerohet. Në të njëjtën kohë, nevojat për financim janë shumë të larta pasi konfliktet shumëfishohen dhe kriza klimatike përkeqësohet. Në vitin 2023, hendeku i financimit arriti një nivel të ri rekord, pasi nuk u sigurua as 40 për qind e 56.7 miliardë dollarëve të kërkuar”,deklaroi Lenarçiç.

Sipas tij, në kushte të tilla, BE-ja do të vazhdojë të avokojë dhe mobilizojë komunitetin ndërkombëtar "për të kapërcyer kolektivisht këtë boshllëk alarmues në financim".

"Në të njëjtën kohë, ne do të vazhdojmë të kontribuojmë në mënyrë proaktive në forcimin e bashkëpunimit ndërsektorial, veçanërisht me aktorët e zhvillimit, për të ndërtuar qëndrueshmërinë lokale për të ofruar shpëtim për ata që kanë nevojë dhe për të çliruar sa më shumë njerëz të jetë e mundur nga varësia e ndihmës", shtoi Lenarçiç.

Ai thekson se në vitin 2023 mbi 91 për qind e kontributeve të ndihmave humanitare erdhën nga vetëm 20 donatorë, ndër të cilët tre të parët, përfshirë Komisionin Evropian, siguruan 58 për qind të financimit humanitar global.

“Kjo përgjegjësi e përbashkët globale nuk mund të merret vetëm nga Evropa. Kjo është e paqëndrueshme. Prandaj, është thelbësore që bashkësia ndërkombëtare të gjejë një mënyrë më të ekuilibruar dhe më të drejtë për financimin e ndihmës humanitare, në përputhje me aftësitë e secilit vend në veçanti”, konkludoi Lenarçiç.

Që nga viti 1992, Komisioni Evropian ka ofruar ndihmë humanitare për mbi 110 vende, duke ndihmuar çdo vit me miliona njerëz në mbarë botën.

Foto: Arkivi i MIA-s