Shkup, 10 korrik 2025 (MIA) - Komisioni Evropian, në raportin e tij për gjendjen e sundimit të ligjit në vendin tonë, vëren përparim në hetimet dhe aktakuzat e ngritura për vepra penale në fushën e korrupsionit, duke shtuar se procedurat e gjata gjyqësore dhe burimet e pamjaftueshme e bëjnë të vështirë ndjekjen penale të korrupsionit të nivelit të lartë.

Në raport, siç kumtoi Prokuroria Publike, theksohet udhëzimi për dhënien e përparësive të rasteve të korrupsionit të lëshuara nga Prokurori Publik i Republikës së Maqedonisë së Veriut.

"Prokuroritë Publike tregojnë kapacitet të shtuar hetimor, bashkëpunim më të mirë ndërinstitucional dhe katër qendrat hetimore tani janë funksionale", thuhet në raportin, i cili shqyrton situatën në këtë fushë, duke ndjekur shembullin e raporteve të ngjashme të përgatitura për shtetet anëtare të BE-së.

Për më tepër, raporti vëren se prokurorisë, veçanërisht PTHPNKOK, nuk i janë ndarë mjete të mjaftueshme financiare dhe punësim, veçanërisht ekspertëve financiarë.

"Burimet e kufizuara financiare të alokuara për gjyqësorin, përfshirë prokurorinë publike, vazhdojnë të ndikojnë në pavarësinë e tij financiare, konstaton Komisioni Evropian në raport. Në të shënohet se  Prokuroria Publike merr vetëm 0.22 përqind, në vend të 0.4 përqind të planifikuar, të buxhetit të shtetit, dhe se gjykatat dhe  prokuroritë publike ende kërkojnë miratim formal nga Ministria e Financave për të gjitha shpenzimet buxhetore, gjë që pasqyron autonominë buxhetore", njoftojnë nga  Prokuroria Publike.

Komisioni Evropian në raport thekson mungesën e burimeve njerëzore, si dhe sfidat në lidhje me dixhitalizimin, të cilat kanë efekt në efikasitetin e sistemit të drejtësisë duke zgjatur procedurat gjyqësore.

Efekti i ndryshimeve në Kodin Penal vazhdon të dëmtojë ndjeshëm përpjekjet për të luftuar korrupsionin, thuhet në dokument.

"Ndërhyrja dhe presioni nga autoritetet e tjera shtetërore mbi gjyqësorin ngre shqetësime serioze në lidhje me pavarësinë e gjyqësorit, thuhet, me theks të veçantë në procedurën e nisur për shkarkimin e prokurorit publik të shtetit, e cila, sipas Komisionit, "nxori në pah mangësitë në procedurën e shkarkimit dhe rreziqet e politizimit të saj", thuhet në kumtesën e Prokurorisë Publike.

Nga atje theksojnë se Komisioni, duke komentuar mbi bazat në të cilat u propozua shkarkimi i prokurorit publik të shtetit, citon formulimin "sjellje e papërshtatshme që dëmton reputacionin e Prokurorisë Publike" si një përkufizim shumë të gjerë të përgjegjësisë disiplinore që krijon pasiguri ligjore dhe hap mundësinë e politizimit të procedurës për shkarkimin e prokurorit publik të shtetit.

"Në të gjithë sektorin gjyqësor vihet re se po merren masa për të forcuar transparencën, megjithëse ende ka shqetësime në lidhje me procedurat për përzgjedhjen e gjyqtarëve dhe prokurorëve publikë, të cilat nuk janë mjaftueshëm transparente dhe të argumentuara mirë", thuhet në kumtesën e Prokurorisë Publike. sa/

Foto: MIA