Shkup, 1 shtator 2025 (MIA) - Agjencia për Siguri Kombëtare (ASK) sot pasdite me solemnitet në Klubin e deputetëve shënoi 1 Shtatorin - Ditën e Agjencisë. "Një shtet i sigurt, qytetarë të sigurt", është misioni i Agjencisë, ndërsa drejtori Bojan Hristovski premton se nga ky qëllim nuk do të heqin dorë.

Në një deklaratë për mediat, Hristovski tha se gjatë vitit të kaluar që kur ai është drejtor i këtij institucioni, ata kanë punuar në disa segmente, duke filluar nga ndërtimi i infrastrukturës së TI-së, personeli, deri te prishja e planeve për aktivitete terroriste duke shkatërruar një grup terrorist në vend.

"Duhet të theksoj se partnerët tanë, përveç mediave, janë edhe qytetarët dhe të gjithë së bashku duhet të jenë aktorë në sigurinë kolektive. Një shtet i sigurt, qytetarë të sigurt është misioni ynë dhe kjo është ajo që synojmë dhe nuk do të dorëzohemi derisa ta arrijmë", tha Hristovski.

Kryeministri Hristijan Mickoski, i cili mori pjesë në shënimin e Ditës së ASK-së, vlerësoi se Agjencia është konsoliduar me sukses gjatë vitit të kaluar, sepse, siç theksoi ai, situata aktuale ishte shqetësuese. Në periudhën e ardhshme, ai pret rezultate edhe më të mira që do të çojnë në siguri më të madhe si për shtetin ashtu edhe për qytetarët.

"Situata aktuale ishte, nuk do të thoja alarmante, por më tepër se nuk kishte situatë. Nuk po fillonim nga e para, kishim shkatërruar themelet, po fillonim nga një minus i thellë, por në një kohë shumë të shkurtër situata po konsolidohet. Pres rezultate dhe siguri më të madhe si për Maqedoninë ashtu edhe për qytetarët. Në periudhën e kaluar janë ndërmarrë një numër i madh veprimesh të suksesshme, disa prej tyre në mënyrë të pavarur, disa me partnerët tanë strategjikë. Mund t'i shpreh mirënjohjen time drejtorit për gjithçka që ka bërë gjatë vitit të kaluar, ai e ka konsoliduar me sukses Agjencinë, po punojmë në plane të ardhshme siç janë reformimi, ristrukturimi, ripozicionimi i sistemit të sigurisë së shtetit. Është një proces dinamik sepse vetë çështja është dinamike dhe duhet të përshtatesh vazhdimisht", tha Mickoski.

Agjencia për Siguri Kombëtare është organ i pavarur i administratës shtetërore, i themeluar me qëllim mbrojtjen e sigurisë kombëtare të shtetit, përkatësisht mbrojtjen e pavarësisë, sovranitetit, rendit kushtetues, të drejtave dhe lirive themelore të njeriut dhe qytetarit të garantuara me Kushtetutën e Republikës së Maqedonisë së Veriut, si dhe çështje të tjera me interes për sigurinë kombëtare të shtetit.

Hristovski u emërua drejtor i ASK-së në tetor të vitit të kaluar. Ai është drejtori i tretë i Agjencisë për Siguri Kombëtare. sa/

Foto: MIA