Shkup, 10 tetor 2025 (MIA) - Gjykata Kushtetuese e Republikës së Maqedonisë së Veriut dhe Gjykata Kushtetuese e Republikës së Kosovës nënshkruan memorandum për mirëkuptim dhe bashkëpunim të ndërsjellë në fusha nga interesi i përbashkët, me të cilin, siç informojnë nga Kushtetuesja, vendosen bazat për thellimin dhe institucionalizimin e bashkëpunimit mes gjykatave kushtetuese të dy vendeve.

Memorandumi u nënshkrua nga kryetarët e dy gjykatave, Darko Kostadinovski dhe Nexhmi Rexhepi dhe është rezultat i komunikimit të deritanishëm konstruktiv dhe të suksesshëm, ndërsa qëllimi i tij është të mundësojë zhvillim të vazhdueshëm të marrëdhënieve, avancim të kapaciteteve profesionale dhe përmirësim të praktikës gjyqësore dhe vendimeve të marra.

"Në kuadër të bashkëpunimit parashikohet organizimi i konferencave të përbashkëta shkencore, seminareve dhe trajnimeve profesionale, si dhe shkëmbimi i përvojave, praktikave gjyqësore, rezultateve hulumtuese dhe literaturës relevante. Me këtë krijohet një platformë për mbështetje më të madhe të ndërsjellë dhe shkëmbim të praktikave të mira në fushën e gjyqësorit kushtetues", thuhet në kumtesën e Gjykatës Kushtetuese.

Memorandumi i nënshkruar për mirëkuptim hyn në fuqi menjëherë dhe do të jetë i vlefshëm për pesë vjet, me mundësi për vazhdim pas skadimit të asaj periudhe. sa/

Foto: Gjykata Kushtetuese e RMV-së