Shkup, 11 tetor 2025 (MIA) - Kryetari i LSDM-së, Venko Filipçe, vlerëson se Oda e Mjekëve duhet të reagojë dhe të vlerësojë nëse një mjek në gjendjen në të cilën u kap drejtori i Klinikës së Neurologjisë, Igor Kuzmanovski, mund të trajtojë pacientë. Sipas Filipçes, është mirë që Kuzmanovski është shkarkuar menjëherë nga puna, por pret edhe reagim nga Oda e Mjekëve.

"Mendoj se është mirë që ai u pushua menjëherë dhe shumë shpejt nga puna. Dhe në të njëjtën kohë, mendoj se Oda e Mjekëve duhet të reagojë në aspektin e vlerësimit nëse dhe sa kohë më parë ka ndodhur kjo, domethënë nëse një mjek në një gjendje të tillë mund të trajtojë pacientë. Kjo është një çështje shumë serioze. Ndoshta jeta e disa prej pacientëve të tij ishte në rrezik nëse ai do të ishte në një gjendje të tillë, të mos paragjykojmë tani. Por kjo çështje meriton një analizë dhe shqyrtim serioz nga Oda", theksoi Filipçe.

I pyetur nëse përgjegjësia penale është e nevojshme për Kuzmanovskin, Filipçe theksoi se nuk do të donte të futej në atë pjesë dhe se institucionet që merren me të do të flasin vetë për të.

Pas publikimit të videos, ministri i Shëndetësisë Azir Aliu njoftoi dje se kishte marrë vendim për të shkarkuar Dr. Kuzmanovskin nga posti i drejtorit. Mbrëmë, Kuzmanovski kërkoi falje nëpërmjet Fejsbuk-ut dhe shprehu keqardhje për veprimet e tij.

VMRO-DPMNE, kuadër i së cilës është Kuzmanovski, mbrëmë njoftoi se mbështet vendimin për shkarkimin e drejtorit të Klinikës së Neurologjisë dhe kërkon që institucionet të veprojnë në përputhje me ligjin dhe procedurat e përcaktuara. sa/

Foto: Printskrin nga video