Shkup, 11 tetor 2025 (MIA) - Kryetari i LSDM-së, Venko Filipçe, sot i bëri thirrje ministrit të Punëve të Jashtme dhe Tregtisë së Jashtme, Timço Mucunski, që të informojë publikun më së voni deri nesër nëse ka bisedime me Britaninë e Madhe për vendosjen e migrantëve në vendin tonë. Filipçe e tha këtë duke komentuar artikullin e botuar në "Politiko" se Britania është afër një marrëveshje për hapjen e një qendre për kthimin e migrantëve në një vend në Ballkanin Perëndimor.

"Ministri Timço Mucunski duhet të thotë nëse po diskuton për sjelljen e migrantëve në vendin tonë. Ai duhet të thotë nëse kjo ka të bëjë me atë paketë kredie prej shtatë miliardë eurosh? A ka ndonjë lidhje? A është Qeveria e kushtëzuar ta bëjë këtë për ato para?, tha Filipçe.

Duke iu përgjigjur pyetjes së një gazetari, ai theksoi se qeveria e VMRO-DPMNE-së po pengon me vetëdije procesin e reformës në gjyqësor me qëllim që të ndikojë politikisht në emërimin e gjyqtarëve dhe prokurorëve. Ai theksoi se në vend të një reforme thelbësore të gjyqësorit, qytetarët po dëshmojnë përpjekje të vazhdueshme për manipulim nga qeveria. Ai kujtoi se reformat në sistemin gjyqësor janë të përcaktuara qartë në axhendën e reformave, të përgatitur nga qeveria e LSDM-së dhe të nënshkruara nga qeveria aktuale e VMRO-DPMNE-së.

"Në atë axhendë reformash, ka 12 ligje që lidhen me shumë aspekte të gjyqësorit. Ato ligje, ligje reformash, nënkuptojnë një forcim të konsiderueshëm të sistemit tonë gjyqësor. Këto ligje përfshijnë Ligjin për Prokurorinë Publike, Këshillin Gjyqësor, për pagat e gjyqtarëve, për lëvizjen e çështjeve gjyqësore e kështu me radhë. Dhe ajo axhendë reformash lidhet me buxhetin. Këtë vit, deri në qershor, duhej të miratoheshin shtatë nga këto ligje, dhe pesë të tjera deri në fund të vitit 2025. Deri më tani, asnjë nga këto 12 ligje nuk është paraqitur në Kuvend. Kjo qeveri nuk po e bën këtë", theksoi Filipçe. sa/

Foto: LSDM