Shkup, 28 shkurt 2025 (MIA) - “E inkurajoj Komisionin për mbrojtjen e konkurrencës që të vazhdojë të kryejë kontrolle në zinxhirët e marketeve”, tha sot ministri i Ekonomisë, Besar Durmisi në konferencë për shtyp, pasi së fundmi u njoftua në opinion se disa rrjete supermarketesh kanë bashkëpunuar për çmime, në kundërshtim me ligjin.

"Komisioni për Mbrojtjen e Konkurrencës në vazhdimësi kryen inspektime në terren dhe vepron në përputhje me dy ligjet, për praktikat e padrejta tregtare dhe për mbrojtjen e konkurrencës. Disa markete në mënyrë të paligjshme janë dakorduar për çmime dhe u kapën nga ky komision. Komisioni kreu inspektime të paparalajmëruara në katër zinxhirë të mëdhenj dhe një odë ekonomike. Për shkak të dyshimit për shkelje të konkurrencës në treg", theksoi ai. 

Inspektimi është kryer në bazë të indikacioneve se këto subjekte kanë shkelur ligjin për mbrojtjen e konkurrencës, i cili ndalon koordinimin ndërmjet ndërmarrjeve. Ai kumtoi se Komisioni do të ngrejë procedurë kundërvajtëse dhe ka paralajmëruar se do të marrë masat më rigoroze. Ministri tha se i mbështet të gjitha këto. Sepse, siç theksoi, ata kanë qenë këtu për të menaxhuar siç duhet me institucionet, jo siç kanë qenë më parë.

Për sa i përket respektimit të kufirit të marzhit, ministri informoi se sipas informacioneve fillestare, kjo po respektohet. Ai tha se autoritetet janë në anën e qytetarëve.

"Aty ku ka mosrespektim, gjobat do të variojnë nga 500 deri në dhjetë mijë euro, deri në mbylljen e marketit. Për këto çështje është kompetent Inspektorati Shtetëror i Tregut", përkujtoi ministri.

Është lidhur memorandum për bashkëpunim ndërmjet Komisionit dhe Inspektoratit, për kontrolle më të mira në terren. ls/

Foto: Arkivi i MIA-s