Shkup, 18 nëntor 2025 (MIA)- Një delegacion në Asamblenë parlamentare të OSBE-së (AP e OSBE-së) i përbërë nga: Monika Zajkova, shefe e delegacionit; Mimoza Musa, anëtare dhe Eli Panova, zëvendësanëtare e delegacionit mori pjesë në Takimin e 23-të të Vjeshtës të AP-së së OSBE-së që u mbajt nga 16 deri më 19 nëntor 2025 në Stamboll, Turqi.

Në kohën kur shënohet 50-vjetori i themelimit të OSBE-së, kjo konferencë parlamentare u hap me thirrje të përforcuara për rigjallërimin e multilateralizmit përmes dialogut dhe bashkëpunimit.

Sesioni i parë i kësaj konference parlamentare u përqendrua në tejkalimin e perspektivave dhe forcimin e dialogut, ndërmjetësimit dhe besimit në epokën e pasigurisë. Në këtë sesion mbajti fjalim deputetja Monika Zajkova, e cila theksoi se peizazhi ndërkombëtar është i shënuar nga kompleksiteti i thellë, sepse konfliktet vazhdojnë dhe tensionet gjeopolitike përshkallëzohen. Në kohën kur dezinformatat përhapen dhe besimi i qytetarëve në institucionet është në rënie, nevojitet përkushtim më i madh për dialog, bashkëpunim dhe përgjegjësi të përbashkët. Prandaj, është e nevojshme të kihen parasysh parimet themelore të OSBE-së se siguria është e pandashme, përkatësisht se të gjithë varemi nga njëri-tjetri. Ajo theksoi se dialogu është mjeti më i rëndësishëm për ruajtjen e paqes dhe se përmes kanaleve të hapura të komunikimit, frika mund të zhduket, dezinformatat mund të korrigjohen. 

Deputetja Zajkova konkludoi se pavarësisht nëse pasiguritë rrjedhin nga sfidat gjeopolitike, ekonomike, teknologjike apo ekologjike, ato gjithmonë kërkojnë një frymë të ripërtërirë solidariteti dhe përgjegjësie. Tejkalimi i perspektivave nuk do të thotë eliminimi i dallimeve, por krijimi i hapësirës për mirëkuptimin e tyre, për menaxhimin e tyre me mundësinë e transformimit në paqe.

Në këtë konferencë vjeshte marrin pjesë rreth 200 deputetë, që përfaqësojnë 53 vende pjesëmarrëse të OSBE-së, si dhe disa parlamentarë nga Partnerët Mesdhetarë për Bashkëpunim.

Folësit bënë thirrje për paqe të drejtë në Ukrainë, duke theksuar se çdo negociatë duhet të përfshijë Kievin në tryezë, si dhe një rrugë drejt një paqeje afatgjatë në Lindjen e Afërt bazuar në njohjen e dy shteteve.

Në fjalimin e tij, kryetari i AP-së së OSBE-së, Pere Zhoan Pons (Spanjë), foli për erozionin e optimizmit dikur mbizotërues në të gjithë rajonin e OSBE-së, por megjithatë shprehu shpresën për të ardhmen. Ai vuri në dukje se Evropa po shikon përsëri në humnerën e luftës, e cila shihet në të gjithë Ukrainën, dhe tragjikisht, jo shumë larg nga këtu në Gazë. 

Në këtë drejtim, ai theksoi se Asambleja do të vazhdojë angazhimin e saj në Kaukazin Jugor, duke punuar me të gjitha forcat politike për të ndihmuar në forcimin e demokracisë dhe dialogut, dhe bëri thirrje për thellimin e bashkëpunimit parlamentar me të gjitha vendet e Azisë Qendrore. Ai gjithashtu theksoi rëndësinë e dimensioneve ekonomike dhe ekologjike të sigurisë, duke theksuar në veçanti punën e AP-së për çështjen e ndryshimeve klimatike.

Sekretari i përgjithshëm i OSBE-së, Feridun H. Sinirlioglu, theksoi se OSBE-ja ka përfshirjen, legjitimitetin, përvojën dhe kujtesën historike për të treguar se dialogu dhe bashkëpunimi janë ende të mundura dhe në të vërtetë të nevojshme, veçanërisht në kohërat më të errëta.

Asambleja parlamentare e OSBE-së përbëhet nga 323 parlamentarë nga 57 vende në Evropë, Azinë Qendrore dhe Amerikën e Veriut. Asambleja ofron forum për diplomacinë parlamentare, vëzhgimin e zgjedhjeve dhe forcimin e bashkëpunimit ndërkombëtar për të përmbushur angazhimet e OSBE-së mbi çështjet politike, të sigurisë, ekonomike, të të drejtave të njeriut dhe mjedisit jetësor.

Foto: Kuvend