Gostivar, 9 shkurt 2023 (MIA) - Sektori për Arsim pranë Komunës së Gostivarit në bashkëpunim me Ministrinë e Arsimit dhe Shkencës, sot organizuan dialogun social me moton “Mëso me mençuri, puno me profesionalizëm“, që për qëllim ka rritjen e numrit të paraleleve për mësim dual në shkollat e mesme profesionale dhe inkuadrimin e kuadrove profesionale në kompanitë e Gostivarit.

Mësimi dual zhvillohet në tri shkolla të mesme komunale të Gostivarit, theksoi udhëheqësja e sektorit, Aslian Snopçe dhe shtoi se mësimi dual në Gostivar filloi të zbatohet nga viti 2019 përmes bashkëpunimit të shkollës së mesme teknike dhe EVN-së.

"Tendenca është që tregut të punës t’i oforhet kuadër i trajnuar. Vlen të theksohet se për këto tri vite, është rritur interesimi për shkollat profesionale në Gostivar, me çka tregut të punës i ofrohen gjithnjë e më shumë kuadro profesionale. Shpresoj se edhe paralelet e farmacisë vitin e ardhshëm do të kenë vendin e tyre në këtë program", tha Snopçe.

“Të kesh aftësitë dhe edukimin e duhur, është thelbësore për sukses. Kemi punuar pandërprerë që fëmijëve tanë t’ju ofrojmë kushtet më të mira në shkollat profesionale dhe të jenë të gatshëm për tregun e punës”, theksoi ndër të tjera kryetari Taravari.

Në debat kishte edhe prezantime për projektin e shkollës ekonomike, medicinale dhe teknike, si dhe firmat partnere në aktivitete.

Fushata e dialogut social “Mëso me mençuri, puno me profesionalizëm” është mbështetur nga Ambasada e Zvicrës në RMV dhe Odat Ekonomike në vend. fc/