Shkup, 20 nëntor 2025 (MIA) - Filloi procesi i krijimit të Inventarit kombëtar të ndërtesave publike - një bazë e të dhëanve që duhet të ndryshojë rrënjësisht mënyrën se si shteti planifikon, investon dhe menaxhon me objektet e tij publike. Ngjarja, e mbajtur në Sallën solemne të Qeverisë, mblodhi përfaqësues të ministrive resor, komunave dhe institucioneve publike, të cilët edhe një herë konfirmuan rëndësinë e mbledhjes sistematike dhe analizës së të dhënave relevante për disa mijëra ndërtesa publike në të gjithë vendin, informojnë nga Ministria e Energjetikës, Minierave dhe Burimeve Minerale.

Siç theksojnë, në fjalimin e saj, ministrja e Energjetikës, Minierave dhe Burimeve Minerale, Sanja Bozhinovska, e theksoi rëndësinë reformuese të këtij procesi.

"Ky është një mjet reforme që na lejon që më në fund të kemi një pamje të saktë dhe të plotë se si funksionon sektori publik përmes prizmit të efikasitetit të energjisë. Për herë të parë, ne do të bashkojmë në një vend të dhënat mbi konsumin e energjisë, emetimet, gjendjen e ndërtesave dhe nevojat e rinovimit. Kjo njohuri është pika jonë më e fortë fillestare. Pa të dhëna të sakta dhe precize, nuk ka politika të zgjuara, nuk ka investime të mira, nuk ka të ardhme të qëndrueshme energjetike. Ne nuk po e bëjmë këtë për të përmbushur një detyrim formal, po e bëjmë këtë për të ndërtuar hapësira publike që janë efikase nga ana energjetike, rezistuese dhe bashkëkohore. Hapësira që do të nënkuptojnë fatura më të ulëta, shpenzime më të ulëta dhe ndërtesa më funksionale si për institucionet ashtu edhe për qytetarët që i përdorin ato çdo ditë", tha Bozhinovska.

Drejtori i Shoqatës gjermane për bashkëpunim ndërkombëtar (GIZ) për Maqedoninë e Veriut, David Oberhuber, theksoi se Inventari Kombëtar nuk është vetëm një proces teknik, por një detyrim për të ardhmen.

Investitorët - vendas ose ndërkombëtarë - financojnë atë që është e matshme. Ky inventar do t'i japë Maqedonisë së Veriut një pamje të qartë të asaj që i nevojitet, por edhe një bazë të fortë për të tërhequr mjete për rinovimin e ndërtesave publike, për të ulur konsumin e energjisë dhe kështu për t'i bërë institucionet më të mira për qytetarët. GIZ mbetet plotësisht i përkushtuar ndaj këtij bashkëpunimi", theksoi Oberhuber.

Profesori në Fakultetin e Inxhinierisë Mekanike në Shkup, Dame Dimitrovski, theksoi dimensionin ekologjik dhe ekonomik të procesit.

"Ndërtesat publike në Maqedoni janë ndër konsumatorët më të mëdhenj të energjisë dhe në të njëjtën kohë një burim i rëndësishëm i emetimeve - jo vetëm CO₂, por edhe grimca të ngurta që ndikojnë në cilësinë e ajrit në qytetet tona. Çdo hap drejt modernizimit të tyre dhe përmirësimit të efikasitetit energjetik do të thotë jo vetëm përmbushje e detyrimeve ndaj Komunitetit të Energjisë dhe marrëveshjeve ndërkombëtare, por edhe ajër më të pastër, komunitete më të shëndetshme, kushte më të mira pune dhe institucione publike më të qëndrueshme ekonomikisht. Si Qeveri, ne e njohim rëndësinë e kësaj çështjeje. Në vitet e fundit, kemi filluar përgatitjen e një sërë dokumentesh dhe programesh strategjike për efikasitet energjetik, rinovim dhe modernizim të ndërtesave publike", theksoi Dimitrovski.

Inventari kombëtar, siç theksohet në kumtesën, është një mjet kyç për investimet e ardhshme. Ndërtesat publike - spitalet, shkollat, ndërtesat administrative dhe institucionet kulturore - janë ndër konsumatorët më të mëdhenj të energjisë në vend. Një ndryshim në menaxhimin e këtyre ndërtesave është i nevojshëm, pasi sektori publik ka detyrimin të tregojë rrugën dhe të jetë një shembull për përdorimin racional, të qëndrueshëm dhe të përgjegjshëm të energjisë.

"Inventari kombëtar do të mundësojë: një vlerësim sistematik të situatës energjetike të secilës ndërtesë publike; përcaktimin e prioriteteve për rinovim; përpunimin e një portofoli investimesh; planifikim më efikas të buxhetit; shërbime të përmirësuara për qytetarët. Ky proces është pjesë e projektit të Partneritetit për efikasitet energjetik të ndërtesave (PEEB Cool), i financuar nga Fondi i gjelbër klimatik, Agjencia franceze e Zhvillimit (AFD) dhe qeveria gjermane përmes GIZ", specifikohet në kumtesën e ministrisë së Energjetikës, Minierave dhe Burimeve Minerale. ls/

Foto: MEMBM