Shkup, 23 prill 2023 (MIA) - Të gjitha procedurat do të zbatohen në mënyrë që korridoret të ndërtohen me kohë, shpejt dhe me efikasitet, theksoi sot ministri i Transportit dhe Lidhjeve Bllagoj Boçvarski.

"Për sa i përket fillimit të ndërtimit të korridoreve, tashmë kemi bërë me dije se data 22 prill është fillimi i zbatimit të Marrëveshjes, ku kontraktori fillon me zhvillimin e projekteve, të projekteve urbane dhe bazë për të nisur procedurën e shpronësimit të tokës që është private. Të regjistrohet terreni, kushtet, gjendja ekzistuese e trasesë, për të parë se ku ka instalime nëntokësore dhe mbitokësore, të cilat mund të duhet të zhvendosen gjatë vetë ndërtimit. Për të përcaktuar procedurën për hulumtime gjeoteknike dhe gjeomekanike", tha Boçvarski, duke iu përgjigjur pyetjes së gazetarit në Aeroportin Ndërkombëtar të Shkupit, ku sot zbarkoi aeroplani i parë i kompanisë "Lufthanza" nga Frankfurti.

Pa analiza kaq cilësore që i paraprijnë fillimit të ndërtimit, do të kemi, siç tha ai, probleme të mëdha dhe vonesa në ecurinë e mëtejshme të ndërtimit dhe kjo do të ketë ndikime negative në të gjithë projektin. "Për këtë, hap pas hapi do të zbatohen të gjitha procedurat që korridoret të ndërtohen me kohë, shpejt dhe me efikasitet sepse qytetarët nuk kanë më kohë për të humbur", tha Boçvarski.

Sipas tij, qytetarët e Prilepit, Manastirit, Tetovës, Gostivarit, Kërçovës, Strugës dhe Ohrit duhet të pyeten se në çfarë lloj infrastrukture duan të udhëtojnë dhe nëse duhet ta presin atë infrastrukturë në pesëmbëdhjetë vitet e ardhshme apo duhet bërë një orë më shpejt.

"Deri më tani nuk i janë paguar mjete kompanisë. Pagesa e parë e mjeteve do të ishte avansi për fillimin e punëve ndërtimore, dhe çdo denar i paguar nga shteti dhe Qeveria për Ndërmarrjen Publike për Rrugë Shtetërore, ndërsa më pas për kontraktorin, do të publikohet në faqen e Financave Publike", tha Boçvarski.

Në pyetjen e një gazetari për ndryshimet në Ligjin për ndërtim, Boçvarski përsëriti se bëhet fjalë për një procedurë të re dhe një sistem të ri ndërtimi, ku fillimisht do të miratohet projekti urbanistik, i cili do të përcaktojë rrugën nëpër të cilën do të fillojë procedura e shpronësimit të tokës.

"Meqenëse ky projekt parashikon ndërtimin me faza dhe projektimin e pjesëve individuale të një seksioni, do të thotë se shteti nuk mund të lëshojë dhjetë herë leje ndërtimi për të njëjtin seksion. Dhe pikërisht për këtë, në lidhje me projektin bazë me revizion, do të respektohet procedura, e cila do të dorëzohet, teknikisht e saktë, e vërtetuar nga inxhinierë statikë. Për sa i përket rezistencës mekanike dhe qëndrueshmërisë, i gjithë projekti do të konfirmohet gjithashtu. Megjithatë, i gjithë projekti parasheh ndërtim me faza dhe për këtë me ndryshimet ligjore parashihet një model i ri që do të parashikojë ndërtim më të shpejtë", tha ministri i Transportit dhe Lidhjeve.

Sipas Boçvarskit, të gjithë janë të interesuar për ndërtim të përshpejtuar të korridoreve. Ai shfaqi shpresën se të gjitha partitë politike do të japin një kontribut në drejtim të përshpejtimit të procesit të ndërtimit në mënyrë që sa më shpejt, siç tha ai, të marrim një infrastrukturë moderne të ndërtuar që do të kontribuojë për më shumë ekonomi dhe siguri në komunikacion. sa/

Foto: MIA