Shkup, 5 prill 2026 (MIA) – Ministri i Transportit, Aleksandar Nikolloski thotë se bisedimet për zgjidhjen e problemit të transportuesve pas vendosjes së sistemit EES për hyrje në BE po ecin mirë dhe se deri më 30 shtator kur ai duhet të fillojë të zbatohet për transportuesit nga Maqedonia ka kohë që të përfundojnë të gjithë procedurat. 

“Bisedimet po ecin mirë. Pra, në pjesën e kamionëve dhe autobusëve, sistemi do të fillojë të zbatohet nga 30 shtatori. Pra, tashmë kemi marrë shtyrje. Kjo është periudhë e mjaftueshme për të përfunduar të gjitha procedurat. Ne po shkojmë për viza afatgjata. Zvicra tashmë i ka futur ato dhe ato tashmë po lëshohen. Në Kroaci, ligji është në Parlament. Presim që të miratohet brenda disa javësh. Në Rumani, ai ka hyrë në procedurë. Në Hungari, morëm premtim gjatë vizitës sonë të fundit se pasi të mbarojnë zgjedhjet dhe të formohet Parlamenti, ligji do të hyjë gjithashtu në procedurë”, tha zëvendëskryeministri Nikolloski në përgjigje të pyetjes së gazetarëve pas inspektimit të punimeve të ndërtimit të seksionit të parë të "Trenit të qytetit".

Ai paralajmëroi se në gjysmën e dytë të prillit një delegacion nga Maqedonia e Veriut i kryesuar nga kryeministri Hristijan Mickoski do të shkojë në Austri, ku në takime kjo do të jetë një nga pikat kryesore. 

“Mbetet edhe Gjermania dhe me këtë rutat kryesore të transportuesve nga Maqedonia do të zgjidhen. Tani ruta e ardhshme e madhe është Britania e Madhe, por duke pasur parasysh se ajo është jashtë Bashkimit Evropian dhe nga zona Shengen, aty ka rregulla të veçanta të cilat zbatoheshin edhe deri më tani”, tha zëvendëskryeministri dhe ministër i Transportit, Nikolloski. fc/

Foto: Ministria e Transportit