Shkup, 5 gusht 2025 (MIA) - Bashkmimi Demokratik për Integrim (BDI) pasdite pas një seance të Kryesisë qendrore i ka publikuatr emrat e kandidatëve për disa komuna, me të cilat do të marrë pjesë në zgjedhjet lokale në tetor.

Kryetari i BDI-së, Arbër Ademi në konferencë për shtyp njoftoi se parti do ta kandidojë Fatmir Deharin edhe për një mandat për kryetar komujne në Kërçovë. 

Edhe për një mandat tjetër besimin e qytetarëve të Komunës së Likovës do ta kërkojë Erkan Arifi. Kandidati për kryetar të Komunës së Çashkës është Suat Shaqiri, për Komunën e Studeniçanit është Ejup Abazi.

Kryesia qendrore e BDI-së ka vendosur të mbështesë kandidaturën e pavarur për kryetar të Komunës së Bërvenicës të Enver Pajazitit.

Ademi informoi se Kryesia Qendrore e partisë ka marrë vendim për emrat e bartësve të listave të këshilltarëve të disa komunave. Në Komunën e Dibrës, bartës i listës së këshilltarëve do të jetë Artin Spahiu, kryetar aktual i degës së BDI-së në Dibër. Në Komunën e Sarajit, bartës i listës do të jetë Iljaz Veseli, ushtrues detyre i kryetarit aktual të Komunës së Sarajit. Në Komunën e Vrapçishtit, bartës i listës së këshilltarëve do të jetë Evzal Arslani.

Ademi njoftoi se në seancat e ardhshme të Kryesisë qendrore të partisë do të vendosin për kandidatët për kryetar të Qytetit të Shkupit, Komunës së Bogovinës, Komunës së Dollnenit, Komunës së Pllasnicës dhe bartësit e listave të këshilltarëve për komunat e Tearcës dhe Haraçinës.

Më parë, BDI njoftoi se emrat e kandidatëve për kryetar të Komunës në Komunën e Çairit do të jetë Bujar Osmani, në Komunën e Tetovës kandidati Bajram Rexhepi, në Komunën e Zhelivës - Emir Sulejmani. mb/

Foto: MIA