Shkup, 23 korrik 2025

Universitetet dhe institutet shqiptare po përjashtohen sistematikisht nga financimet publike për projekte shkencore, thotë Belinda Amiti nga Aleanca për Shqiptarët. 

“Kjo nuk është vetëm shpërndarje e padrejtë fondesh – është një strategji e qëllimshme për të zhveshur universitetet shqiptare nga çdo mundësi zhvillimi akademik.”

Sipas saj asnjë projekt ndërtimi i objekteve arsimore nuk është financuar në komunat shqiptare, ndonëse ato përballen me mungesë infrastrukture themelore.

“Qeveria ndan miliona për shkolla në Kisella Vodë, Manastir e Vallandovë, por asnjë qindarkë për Tetovën apo Çairin. Kjo është ndëshkim përmes shpërfilljes.”

Sipas saj, reformat arsimore bëhen në mënyrë të nxituar dhe burokratike, pa përfshirjen e komunitetit arsimor në terren.
“Çdo ministër sjell nga një ‘reformë’ të vetën, pa analizë, pa konsensus dhe mbi të gjitha – pa sukses. E pësojnë nxënësit dhe mësuesit.”

Sipas saj përdorimi i IA-së po futet në arsim pa strategji kombëtare, pa pilotim dhe pa kuadër etik e shkencor.

“Nuk mund të bëjmë eksperiment me trurin e fëmijëve tanë. Teknologjia duhet të ndihmojë arsimin, jo ta zëvendësojë atë. Kërkojmë kontroll, jo improvizim”, thotë Amiti.

Aleanca për Shqiptarët kërkon financim të barabartë për të gjitha universitetet publike; përfshirje të komunitetit akademik shqiptar në çdo reformë dhe krijimin e një Komisioni të Pavarur për mbikëqyrjen e përdorimit të IA-së në shkolla.
“Arsimi nuk është terren për eksperimente politike apo teknologjike. Është themeli i së ardhmes sonë dhe duhet të trajtohet me drejtësi, dinjitet dhe vizion”, thotë Amiti.

Aleanca për Shqiptarët

_______________________________________________________________________________________________________________________________________________________________

MIA këto tekste i publikon në formën integrale dhe origjinale dhe nuk mban përgjegjësi për përmbajtjen e tyre dhe as për mangësitë eventuale drejtshkrimore apo gabimet e shtypit.