Shkup, 17 janar 2025 (MIA) - Zëvendësministri i Arsimit dhe Shkencës, Lulzim Aliu, sot në një konferencë për media deklaroi se Qeveria e ka rritur buxhetin e arsimit për këtë vit për më shumë se dy milionë euro dhe kap vlerën e 11,5 milionë eurove. 

"Për vitin 2025 Qeveria ka vendosur të rrisë buxhetin e arsimit si asnjëherë më parë. Pra, bëhet fjalë për një buxhet që do të arrijë në 11.5 milionë euro, shumë që në vitin 2024 ishte vetëm nëntë milionë euro. VLEN rriti buxhetin e arsimit për më shumë se dy milionë euro. VLEN avokon për ngritjen e cilësisë së arsimit, sepse ne besojmë se hallka më e rëndësishme në sistemin shtetëror është arsimi, në fakt për ne është faktori kryesor në krijimin e një perspektive të re dhe produktive", tha Aliu.

Kjo, theksoi zëvendësministri, tregon seriozitetin dhe përkushtimin e VLEN-it në fushën më delikate të arsimit, e cila siç tha ai ishte në letargji totale.

"Me krenari, kënaqësi dhe përgjegjësi të plotë, informojmë opinionin e gjerë se VLEN ka rritur buxhetin edhe për Universitetin e Tetovës, ku për vitin 2025 janë planifikuar 18 milionë euro, ndërsa buxheti i të njëjtit universitet për vitin 2024 ka qenë 12 milionë euro. Pra, kemi një rritje prej 6 milionë euro për këtë vit. Ky është ndryshimi nga plani në fushë. Përgjegjësia jonë nuk mbaron këtu, sepse qasja jonë nuk është as selektive dhe as e pjesshme, ne kujdesemi shumë për universitetet tona publike sepse dimë edhe historinë e themelimit të tyre. Prandaj, sikurse në Universitetin e Tetovës, kemi ndarë një buxhet shumëfish më të madh se në vitet e kaluara. Për Universitetin Nënë Tereza janë ndarë 4.8 milionë euro për vitin 2025. Ministria e Arsimit dhe Shkencës në vitin 2025 u përgatit të rrisë cilësinë e mësimdhënies duke përmirësuar infrastrukturën arsimore, duke reformuar sistemin e financimit të granteve dhe duke siguruar cilësi dhe efektivitet në arsimin e lartë në përputhje me praktikat e mira evropiane. Koalicioni VLEN avokon me shumë përgjegjësi edhe për arsimin e mesëm, ku kemi parashikuar një rritje të buxhetit në vitin 2025 në 29 milionë euro. Me rritjen e pagave të mësimdhënësve si në arsimin fillor ashtu edhe në atë të mesëm, Qeveria jonë do të vazhdojë të avokojë për rindërtimin e shkollave fillore dhe ndërtimin e sallave sportive në shkollat ​​fillore", tha ai.

Zëvendësministri theksoi se gjatë këtij viti do të angazhohen për përmirësimin e cilësisë së jetës së studentëve, përmes përmirësimit të kushteve në konvikte. Ai theksoi se Qeveria ka parashikuar rritje të mjeteve buxhetore të planifikuara për rehabilitim energjetik të konvikteve në vlerë prej gjashtë milionë euro.

Ai theksoi se VLEN bën përpjekje për qeverisje të mirë, cilësi më të mirë në arsim dhe kushte më të mira për studentët. sa/

Foto: Printskrin nga video