Скопје, 11 март 2025 (МИА) - Членови на Пратеничката група на Собранието на Република Северна Македонија за соработка со парламентите на балтичките земји - Естонија, Летонија и Литванија оствариле средба со амбасадорката на Литванија во Скопје, Вилма Дамбраускиене, во пресрет на возвратната посета на собраниска делегација на Вилнус, во почетокот на есента.

Како што информира собраниската прес-служба, претседателката на ПГ за соработка со Парламентот на Литванија, Моника Зајкова, изразила задоволство за отворањето на Канцеларијата на литванската амбасада во Скопје и ја поздравила можноста за размена на искуства со оваа балтичка држава.

-Соговорниците се согласија дека Северна Македонија и Литванија, кои годинава одбележуваат три децении од воспоставувањето на дипломатските односи, во континуитет негуваат добри билатерални релации, кои треба да се продлабочуваат во повеќе области, како и во делот на парламентарната соработка, се наведува во соопштението. 

На средбата присуствувале и пратениците Халил Снопче, Јованка Тренчевска и Велика Стојкова Серафимовска, кои се вклучиле во дискусијата со амбасадорката Дамбраускиене.

-Притоа беа разменети мислења за застапеноста на жените во Собранието на Северна Македонија и на лидерски позиции во другите институции, како и за политиките на Литванија во областа на дигитализацијата, образованието и младите, социјалната заштита и човековите права. Соговорниците, исто така, разговараа и за регионалната соработка меѓу балтичките земји, како и за политиките во однос на дијаспората, соопшти собраниската прес-служба. хс/дма/

Фото: Собрание на Република Северна Македонија