Париз, 18 октомври 2024 (МИА) - Зголемувањето на воената поддршка на Северна Кореја за Русија е „многу алармантно“, соопшти денеска француското Министерство за надворешни работи.

Јужнокорејското разузнавање претходно соопшти дека Северна Кореја распоредила првичен контингент од 1.500 специјалци во Владивосток и наскоро ќе испрати уште повеќе.

„Зголемувањето на севернокорејската соработка и поддршката за руските воени напори во Украина е многу алармантно“, изјави портпаролот на француското Министерство за надворешни работи, Кристоф Лемуан.

Според него, доколку оваа информација на јужнокорејското разузнавање се покаже како вистинита, тоа ќе биде крајно алармантен и сериозен развој на настаните.

„Ние можеме само да ги повикаме Северна Кореја и Русија да ги почитуваат резолуциите на Советот за безбедност на ОН“, коментираше и портпаролот.

„НАТО во оваа фаза не може да потврди дека Северна Кореја распоредила војници во Русија“, изјави генералниот секретар на Алијансата, Марк Руте. рп/

Фото: МИА архива