Њујорк, 23 март 2026 (МИА) – Обединетите нации соопштија дека внимателно ја следат ситуацијата во Либан и оти ескалацијата на конфликтот меѓу Израел и Хезболах им нанесува големи страдања на цивилите.

- Длабоко сме загрижени поради континуираните напади врз здравството, вклучувајќи ги здравствените работници, здравствените установи и амбулантните возила – изјави Стефан Дижарик, портпарол на генералниот секретар на ОН, Антонио Гутереш.

- До денеска, СЗО известува за 64 напади врз здравствени установи, што резултираше со 51 смртен случај и 91 повредено лице, што дополнително го оптоварува и онака кревкиот здравствен систем – нагласи тој.

Дижарик рече дека како резултат на тоа, сè повеќе Либанци се раселени.

- Нашите хуманитарни колеги ни велат дека повеќе од 1,2 милиони луѓе, или околу еден од секои пет жители, биле принудени да ги напуштат своите домови; повеќе од 130.000 луѓе, вклучувајќи околу 46.000 деца, моментално се засолнети во повеќе од 600 колективни центри низ целата земја, од кои повеќето се веќе со полн капацитет – рече тој.

Овие бројки веројатно дополнително ќе растат додека „непријателствата се интензивираат, при што израелските власти најавуваат планови за ескалација на копнените операции долж сината линија“, рече Дижарик. јт/

Фото: ЕПА