Торино, 20 октомври 2024 (МИА) - Надежите на Пол Погба повторно да заигра за Јувентус добија удар откако директорот на италијанскиот клуб, Кристијано Џунтоли коментираше дека тимот во Серија „А“ е оформен без него.

Во март ќе истече забраната за допинг на 31-годишниот играч од средниот ред, кој има договор со Јувентус до јуни 2026 година. Погба во септември 2023 година беше позитивен на забранета супстанца која го зголемува нивото на тестостерон.

Казната на поранешниот француски репрезентативец беше намалена претходно овој месец од првичните четири години на 18 месеци од страна на Судот за спортска арбитража и фудбалерот ќе има право да игра за Јувентус веднаш штом ќе заврши забраната.

-Нашата позиција е јасна. Погба беше одличен играч, тој беше надвор од теренот долго време и минатата година бевме принудени да инвестираме во други играчи. Составот е целосно оформен во сегашниот вид, изјави Џунтоли за „Дазн“ пред натпреварот на домашен терен против Лацио. дс

Фото: Архива