Крива Паланка, 21 март 2025 (МИА) - Во Крива Паланка денеска е завршено асфалтирањето на дел од патниот правец Б’с – Кошари, алтернативен пат кон туристичкиот локалитет Калин Камен. 

-Ова е уште еден дополнителен километар од патот, за што се вложени 14.000.000 денари, за изградба и асфалтирање на крак од локалниот пат Крива Паланка – Варовиште – Кошари – Б’с. Средствата се обезбедени преку Биро за регионален развој, а со овој километар се завршени 50 отсто од целиот проект за изградба на патно поврзување до Калин Камен и развој на туризмот, бидејќи општината има изработено проектна документација за целиот пат,во должина од шест километри. Со претходни проекти на локалната самоуправа беа асфалтирани 2 километри, со вложени 13 милиони денари, што значи, досега за овој патен правец инвестирани се вкупно безмалку половина милиони евра, посочуваат од општината.

Целта на општината е континуирано да вложува во создавање услови за развој на туризмот во Крива Паланка, а кон тоа значаен придонес има и подобрата патна инфраструктура. ид/дма/

Фото: Општина Крива Паланка