Shkup, 28 janar 2025 (MIA) - Pacientët onkologjikë, sipas premtimeve, gjatë kësaj jave duhet t’i marrin ilaçet e munguara, për të cilat kanë paralajmëruar edhe përmes mediave. Institucionet kompetente njoftuan se do të sigurohen gjashtë barnat biologjike që mungojnë, ndërsa kryeministri premtoi se problemi i mungesës së barnave në Klinikën e Onkologjisë nuk do të përsëritet në të ardhmen. Dy partitë më të mëdha maqedonase - LSDM dhe VMRO-DPMNE - u akuzuan për problemin me mungesën e barnave.

Ministri i Shëndetësisë Arben Taravari dje në një deklaratë për shtyp tha se këtë javë në Klinikën e Onkologjisë, do të jenë në dispozicion gjashtë barnat biologjik që u mungonin pacientëve, duke shtuar se nuk ka mungesë të gjithë terapisë onkologjike, por përkundrazi, tha ai, "90 për qind e barnave që përdoren si terapi onkologjike gjenden në Klinikën e Onkologjisë".

"Ne deri më tani kemi pasur edhe më shumë terapi biologjike se në vitet e kaluara. Megjithatë, kërkesat nga pacientët janë shumë më të mëdha, prandaj tashmë kemi protokolle dhe një konsultë me mjekët, sepse është vërtetë një luks dhe nuk duhet dhënë kudo, por vetëm aty ku tregohet dhe ku konsulenca mjekësore vendos që duhet dhënë terapi biologjike. Të përsëris edhe një herë – ka barna, jo se mungojnë të gjitha barnat dhe gjatë kësaj jave do të ketë sërish terapi biologjike në Onkologji", tha Taravari.

Ai shtoi se edhe krahas klinikave dhe spitaleve tjera ku do të sistemohet kuadri për të cilin ka leje për punësim, me fokus të veçantë është Klinika për Onkologji, për të cilën planifikohet edhe riorganizimi përkatësisht decentralizimi në trajtimin e pacientëve me kancer.

"Po punohet intensivisht që "8 Shtatori" të fillojë sa më shpejt të funksionojë, me synimin që të ketë më pak pacientë në Klinikën e Onkologjisë. Shtipi, Tetova dhe Manastiri janë duke funksionuar. Në këtë periudhë tashmë po mendojmë të riorganizojmë Klinikën e Onkologjisë, për të funksionuar ngjashëm me Toksikologjinë. Drejtoria duhet të jetë unike dhe drejtori duhet të jetë në gjendje të menaxhojë të gjitha nënnjësitë që do të jenë në qytetet ku mund të shpërndahet ose administrohet terapia onkologjike. Me këtë po e realizojmë qëllimin tonë për decentralizimin edhe në onkologji", tha Taravari.

Drejtori i Fondit për sigurim shëndetësor (FSSH), Sasho Klekovski, tha se "mungesa e barnave biologjike është duke u kompletuar dhe shumë shpejt do të zgjidhet".

"Një pjesë do të zgjidhen me donacione që do të realizohen gjatë javës, pasi që barnat janë të pranishme edhe në depot në Maqedoni, disa do të jenë me anekse të kontratave dhe këtë po e sqarojmë sot dhe nesër me prokurim publik. Pra, mendoj se ilaçet kritike do të jenë në dispozicion shumë shpejt", theksoi Klekovski.

Ai kumtoi se për momentin punojnë në planin, të cilin së shpejti do ta publikojnë, duke filluar nga diagnostika. Në bisedë me Institutin për Patologji dhe PET - Qendra shqyrtojnë se si të shkurtohet koha e diagnostikës, për, siç tha "të gjitha milionat që i investojmë në terapi veçanërisht të shtrenjtë të kenë ndonjë kuptim".

"Kjo nënkupton pajisjen e laboratorëve të patologjisë jashtë Shkupit, rritjen e kapacitetit të skanimit të PET-sken dhe përshpejtimin e procedurave. Ajo që do të bëjmë në pjesën terapeutike është rritja e buxhetit bazë me gati 40-50 për qind, duhet miratuar këtë javë. Dhe kjo do të jetë një rritje e konsiderueshme, disa nga barnat kritike do të rriten dy herë", theksoi Klekovski.

Siç tha ai, do të duhet të mendohet për decentralizimin e terapisë dhe një pjesë e terapisë me tableta të jetë në listën pozitive në mënyrë që të merret jashtë Onkologjisë dhe do të kërkojnë një mënyrë, tha ai, pjesërisht të terapisë biologjike të ndahet jashtë Klinikës për onkologji.

"Kemi reparte onkologjike në "8 Shtatori", në Shtip, Manastir dhe në Tetovë, të cilat aktualisht nuk trajtojnë me terapi biologjike. Ose do të trajtojnë ose nuk kemi nevojë të kemi departamente onkologjike që nuk funksionojnë. Mendoj se së bashku me përmirësimin e Regjistrit të pacientëve, për të siguruar parashikueshmërinë e ndryshimeve, do ta stabilizojmë situatën", shtoi Klekovski. 

Kryeministri Mickoski në intervistë për "360 Shkallë" tha se po përfundon koha e keqpërdorimeve të kompanisë së preferuar farmaceutike në pushtetin e kaluar, e cila ka fituar në ilaçe me çmime ekstremisht të larta në kurriz të pacientëve.

"Më lehtë do të ishte të vazhdojmë sipas parimit 'si deri tani', respektivisht një kompani të preferuar farmaceutike të pushtetit të kaluar ta trajtojmë siç e ka bërë Qeveria e kaluar, të marrin ilaçe në revers, të cilat tre deri katër herë më tepër do t'i paguajmë, pa procedurë adekuate me tender, e pastaj e tërë kjo të kthehet. Ose, megjithatë, të zbatojmë procedurë ligjore të tenderit, ku furnizuesit e tipit të tillë të ilaçeve do t'i sigurojnë për pacientët dhe atë e bëjmë. Menjëherë pas miratimit të buxhetit dhe menjëherë pas shpërndarjes së mjeteve në kuadër të institucioneve shëndetësore, të gjitha këto procedura janë respektuar. Gjatë kësaj jave, e tërë kjo do të zgjidhet dhe tejkalohet dhe për herë të parë më nuk do të ketë keqpërdorime", tha Mickoski.

I pyetur çka është më mirë - të merret në revers ose pacientët të lihen të vdesin duke pritur terapi, Mickoski tha se nuk do të pajtohej me logjikën e tillë, pasi, siç thotë, tani dilema është nëse është më mirë të bëjmë dy vepra penale, ose të mos bëjmë asnjë vepër penale.

"Nëse është më mirë të bëjmë dy vepra penale që t'i ndihmojmë dikujt apo të mos bëjmë vepra penale, e përsëri me veprim të anuluar të ndihmojmë dikë. Unë jam më shumë për këtë të dytën, pasi vepra penale është vepër penale dhe për këtë shkak po kthehemi në të kaluarën, pasi ne ende po përmirësojmë gabime sistematike, të cilat janë pasojë e një menaxhimi të keq në të kaluarën", sqaroi Mickoski.

Pas akuzave nga VMRO-DPMNE këtë fundjavë se ish-ministri i Shëndetësisë, Venko Filipçe është përgjegjës dje, lideri i LSDM-së në konferencë për media njoftoi se në Prokurori ka dorëzuar raporte tremujore për gjashtë muaj për punën e Klinikës së Onkologjisë, si dhe nga grupet eksperte të punës nga koha kur ai ishte ministër. Kërkoi përgjigje nga VMRO-DPMNE, nga deputetja Rashella Mizrahi e cila e udhëhiqte Komisionin e Onkologjisë, si dhe ish ministrin e Shëndetësisë Fatmir Mexhiti pse ishin fshehur këto raporte. Nga Prokuroria pret që të analizohen raportet, por edhe që të hetohet se kush dhe pse i ka fshehur. Filipçe thotë se derisa ishte ministër i Shëndetësisë ka pasur ilaçe në Onkologji, duke përfshirë edhe krizën e Kodivit. 

“Mizrahi, që atëherë e deri më sot, thotë se unë jam përgjegjës për atë rast. Për të kujtuar publikun, akuza ishte se unë si ministër i atëhershëm i Shëndetësisë duhet të kisha mbajtur llogari për detyrimet e Ministrisë së Shëndetësisë ndaj Klinikës së Onkologjisë dhe anasjelltas, dhe i referohet raporteve të rregullta gjashtëmujore të punës të Klinikës dhe të komisioneve të ekspertëve. Të gjitha raportet janë dorëzuar siç duhet, të plotësuara dhe të certifikuara. Edhe në kohët më të vështira të Kovid-it, kur kishte kufizime në lëvizje, asnjë pacient onkologjik dhe pacientët e dinë këtë nuk mbeti pa terapi. E gjithë kjo është përpunuar rregullisht në Ministrinë e Shëndetësisë”, tha Filipçe.

Sipas Filipçes, kundër tij po zhvillohet ajkë politike. Pret, siç thotë, VMRO-DPMNE dhe Rashella Mizrahi urgjentisht të dalin dhe t’i kërkojnë falje të gjithë publikut në Maqedoninë e Veriut që i shkaktuan huti publikut dhe e njollosën emrin e tij, por gjithashtu pret që prokuroria të deklarohet për këtë pjesë të skandalit. 

Në pyetjen e gazetarëve, nëse në raporte ka qëndruar se ka ilaçe, ndërsa nga ana e tjetër pacientët thonin se nuk ka terapi për ata, pse si ministër i Shëndetësisë nuk ka dyshuar se diçka nuk është në rregull, Filipçe tha se në kohën e tij ka pasur ilaçe “në çdo moment për secilin dhe në kohërat më të vështira të kovidit”. 

Për atë nëse do të mbajë përgjegjësi pasi në publik dolën informacione nga ekspertiza e mjekimit joadekuat në Klinikën e Onkologjisë, ai i tregoi raportet. 

“Këtu është përgjegjësia ime për sa i përket detyrimeve të mia si ministër i Shëndetësisë në Ministrinë e Shëndetësisë, për atë që më akuzuan si të munguar, tani po ia tregoj publikut se nuk ka munguar dhe se ka qenë aty rregullisht atëherë si. një raport, si komisione ekspertësh dhe nuk ka për të ndërhyrë apo komentuar për asnjë punë në prokurori apo në punën e punës profesionale të mjekëve tani. “Të presim dhe të shohim se çfarë do të dalë prej saj”, tha Filipçe. mb/

Foto: MIA