Kiev, 18 maj 2023 (MIA) - Presidenti ukrainas Volodimir Zelenski mblodhi sot Këshillin për Riintegrimin e Territoreve të Ukrainës për të diskutuar rimarrjen e kontrollit ukrainas mbi Krimenë dhe tha se çlirimi i gadishullit, i aneksuar nga Rusia në vitin 2014, "do të ndodhë patjetër".

Ai po fliste në një takim në Kiev me rastin e përvjetorit të dëbimit masiv të tatarëve të Krimesë nga gadishulli në vitin 1944 gjatë Bashkimit Sovjetik.

Zelenski tha se gjithnjë e më shumë vende e kuptojnë se "rivendosja e paqes në marrëdhëniet ndërkombëtare, si dhe sundimi i plotë i ligjit ndërkombëtar" do të jetë i pamundur pa kthimin e Krimesë në Ukrainë.

"Ne vazhdojmë punën tonë për çlirimin e Krimesë. Kjo me siguri do të ndodhë – kthimi i plotë i Krimesë në sistemin shtetëror ukrainas”, u tha Zelenski udhëheqësve të tatarëve të Krimesë dhe zyrtarëve të lartë ukrainas.

“Ne po përgatitemi për riintegrimin e Krimesë. Nënshkrova një dekret për Këshillin Këshillimor për riintegrimin dhe deokupimin e Krimesë sonë dhe qytetit të Sevastopolit”, shtoi presidenti ukrainas.

Zelenski dhe zyrtarë të tjerë mbajtën një minutë heshtje në kujtim të viktimave të dëbimit të afër 200,000 tatarëve të Krimesë në Siberi dhe Azinë Qendrore në vitin 1944 me urdhër të liderit sovjetik Josif Stalin.

Zelenski tha gjithashtu se Ukraina po punon për lirimin e tatarëve të Krimesë të ndaluar në Rusi. sa/