Uashington, 13 shtator 2025 (MIA) - Presidenti amerikan Donald Tramp darkoi me kryeministrin e Katarit në Nju Jork, disa ditë pasi aleati i SHBA-së, Izraeli, sulmoi udhëheqësit e Hamasit në Doha.

Izraeli u përpoq të vriste udhëheqësit politikë të Hamasit në një sulm në Katar të martën, gjë që rrezikoi të minonte përpjekjet e mbështetura nga SHBA për të arritur një armëpushim në Gaza dhe për t'i dhënë fund konfliktit gati dyvjeçar.

Sulmi u dënua në Lindjen e Mesme dhe më gjerë si një akt që mund të përshkallëzonte tensionet në një rajon që tashmë ishte në tension. Trampi, në një telefonatë me kryeministrin izraelit Benjamin Netanjahu, shprehu pakënaqësinë e tij nga sulmi dhe kërkoi t'i siguronte katarianët se sulme të tilla nuk do të ndodhnin më.

Trampi dhe kryeministri i Katarit, sheiku Mohamed bin Abdulrahman al-Tani, u shoqëruan nga këshilltari i lartë i Trampit, i dërguari special i SHBA-së, Stiv Vitkof.

"Një darkë e mrekullueshme me presidentin e SHBA-së, sapo mbaroi", njoftoi zëvendës shefi i misionit të Katarit, Hama Al-Muftah, në X.

Shtëpia e Bardhë konfirmoi se darka u zhvillua, por pa dhënë detaje.

Kryeministri i Katarit al-Tani u takua më herët në Shtëpinë e Bardhë me zëvendëspresidentin Xhej Di Vens dhe sekretarin e shtetit Marko Rubio. Një burim i njohur me takimin tha se ata diskutuan të ardhmen e Katarit si ndërmjetës në rajon dhe bashkëpunimin në mbrojtje pas sulmeve izraelite ndaj Hamasit në Doha.

Trampi tha se ishte i pakënaqur me sulmin izraelit, të cilin e përshkroi si një veprim të njëanshëm që nuk përparonte interesat e SHBA-së apo të Izraelit.

Uashingtoni e konsideron Katarin një aleat të fortë në Gjirin Persik. Katari ishte ndërmjetësi kryesor në negociatat e zgjatura për një armëpushim midis Izraelit dhe grupit palestinez Hamas në Gaza, lirimin e pengjeve izraelite në Gaza dhe një plan pas konfliktit për territorin.

Al-Tani të martën akuzoi Izraelin se po përpiqet të sabotojë shanset për paqe, por tha se Katari nuk do të tërhiqet nga roli i tij si ndërmjetës. sa/

foto: EPA