Bruksel, 22 janar 2026 (MIA) – Presidenti amerikan Donald Trаmp ua lehtësoi punën liderëve evropianë në Samitin e sotëm joformal në Bruksel, ku ndoshta nuk do të kishin arritur kurrë një marrëveshje për një "përgjigje të ashpër" ndaj Uashingtonit pas kërcënimeve për të vendosur tarifa dhe për të marrë Grenlandën, vlerësojnë mediat e Brukselit.

Sipas "Euraktiv", pasi shumica e liderëve evropianë me kujdes i “shoshitën” fjalët e tyre javën e kaluar dhe shmangën çdo përmendje të kundërmasave të rrepta tregtare të BE-së kundër Uashingtonit, me fjalimin e tij të djeshëm në Davos, Trampi i kurseu nga sfida e marrjes së vendimeve të vështira në Samitin.

"Politiko" vlerëson se gjithçka ndodhi vetëm në pak orë, një ritëm në të cilin do duhet të mësohemi në vitin 2026.

"Me një goditje të vetme, presidenti i SHBA-së Donald Tramp ka tërhequr kërcënimin për heqjen me forcë të Grenlandës nga tavolina e bisedimeve dhe vendosjen e tarifave që lidhen me këtë pikë, një temë që pritej të dominonte në Samitin e jashtëzakonshëm të BE-së", thekson portali.

"Politiko" thekson se "Marku sot shpëtoi botën", duke vënë në dukje se shefi i NATO-s "arriti të arrijë një lloj marrëveshje".

"Megjithatë, natyra e asaj marrëveshje mbetet një mister. E dimë se në të kanë marrë pjesë të shtatë aleatët e NATO-s në Arktik për t'u siguruar që Rusia dhe Kina asnjëherë nuk do të fitonin një pikëmbështetje në Grenlandë", shton portali.

Mediat e Brukselit vlerësojnë se krijohet përshtypja se institucionet dhe diplomatët evropianë janë të befasuar nga ky zhvillim i ngjarjeve dhe se askush në Bruksel nuk e kishte parashikuar një kthesë të tillë të ngjarjeve nga Trampi.

Reagimet e para nga Evropa ishin se "dita mbaroi më mirë sesa filloi", se "BE-ja është në rrugën e deeskalimit", se "presioni është ulur", por prapë me një dozë skepticizmi dhe me qëndrimin se "një bisedë më e gjerë rreth marrëdhënieve transatlantike është ende e nevojshme".

Të çliruar nga presioni për t'iu përgjigjur kërcënimeve të Trampit, liderët do të jenë në gjendje të përqendrohen më lirshëm në çështjen se çfarë të bëjnë me Komitetin e Paqes për Gazën dhe si të rikalibrojnë marrëdhëniet me Uashingtonin.

Foto: arkivi i MIA-s