Uashington, 4 janar 2024 (MIA) - Ish presidenti i SHBA-së, Donald Tramp, dërgoi ankesë në Gjykatën Supreme të SHBA-së për të imponuar pjesëmarrjen e tij në zgjedhjet në shtetin e Kolorados, njoftoi dje ekipi i fushatës së Trampit, raportoi DPA.

Me këtë veprim, Tramp po kërkon të rrëzojë një vendim të gjykatës më të lartë të Kolorados që e skualifikoi atë nga zgjedhjet paraprake të shtetit për rolin e tij në sulmin e 6 janarit të  vitit 2021 në Kapitolin amerikan në Uashington.

Më 20 dhjetor, Gjykata Supreme e Kolorados vendosi se Tramp nuk ishte i përshtatshëm për zgjedhjet preliminare shtetërore të 5 marsit.

Tramp shpreson të fitojë zgjedhjet presidenciale të vitit 2024 dhe të kthehet në Shtëpinë e Bardhë, por kundërshtarët e tij po përpiqen ta heqin emrin e tij nga fletëvotimet në disa shtete.

Zyrtari më i lartë zgjedhor i Mejn, Sekretarja e Shtetit Shena Bellous, vendosi më 29 dhjetor se peticioni primar për emërimin e ish presidentit ishte "i pavlefshëm".

Sipas Amendamentit të 14-të të Kushtetutës së SHBA-së, Tramp "nuk është i kualifikuar për të kryer funksionin e presidentit", thuhet në vendim.

Avokatët e Trampit të martën paraqitën një kundërshtim zyrtar në gjykatën e Mejn kundër vendimit të Bellous.

Mbështetësit e Trampit sulmuan ndërtesën e Kapitollit amerikan në Uashington më 6 janar të vitit 2021, pas një fjalimi të presidentit të atëhershëm. Kongresi u mblodh atje për të konfirmuar zyrtarisht fitoren e Xho Bajden në zgjedhjet presidenciale të vitit 2020. Pesë persona humbën jetën në dhunë. Tramp duhet të gjykohet për tentativë për mashtrim zgjedhor për veprimet e tij rreth votimit, raporton DPA. sa/

foto: Arkivi i MIA-s