Shkup, 26 tetor 2022 (MIA) - Presidenti Stevo Pendarovski e priti kryetaren e Komisionit Evropian, Ursula fon der Lajen, e cila po qëndron për vizitë në Republikën e Maqedonisë së Veriut.

"Në takim u bisedua për rrjedhën e integrimit evropian të Maqedonisë së Veriut dhe për fazat e mëtejshme të negociatave, situatën në rajonin e Ballkanit Perëndimor, veçanërisht në dritën e agresionit ushtarak rus kundër Ukrainës dhe pasojave ekonomike dhe energjetike që ai shkakton", kumtoi kabineti i Pendarovskit.

Në këtë kontekst, presidenti u informua për pakon e mbështetjes energjetike nga Komisioni Evropian për rajonin e Ballkanit Perëndimor, me qëllim blerjen e përbashkët të energjisë me vendet e BE-së.

Duke e potencuar rëndësinë e solidaritetit evropian, ai përshëndeti ndihmën për të siguruar stabilitetin energjetik të rajonit tonë, që do të ndikojë në zbutjen e pasojave të krizës ekonomike.

Në takim, presidenti Pendarovski përshëndeti nënshkrimin në gjuhën maqedonase të Marrëveshjes ndërmjet Republikës së Maqedonisë së Veriut dhe Bashkimit Evropian për aktivitetet operative të kryera nga Agjencia për Rojet Kufitare dhe Bregdetare Evropiane në Republikën e Maqedonisë së Veriut (FRONTEX), e cila mundëson mbrojtje më të mirë të kufirit dhe sigurinë e qytetarëve të Maqedonisë dhe të BE-së, përmes vendosjes së shpejtë të policëve dhe pajisjeve të huaja.

Lidhur me eurointegrimet, presidenti Pendarovski theksoi se të gjitha institucionet shtetërore po bëjnë të gjitha përpjekjet për të përfunduar me sukses procesin e skriningut, si hap i parë në procesin e negociatave, dhe se vendi është i gatshëm të zbatojë reforma në kapitujt kyç. Në këtë drejtim, ai falënderoi për mbështetjen e Komisionit Evropian dhe theksoi se dinamika e takimeve konfirmon përkushtimin dhe angazhimin e Bashkimit Evropian për integrimin e vendeve të Ballkanit Perëndimor, i cili ka një ndikim pozitiv në proceset e përgjithshme politike dhe agjenda e reformave, si dhe për euron - optimizmi në shoqëritë tona.

Presidenti Pendarovski e informoi Fon der Lajen se së shpejti do të emërohet ambasadori i ri në misionin e përhershëm të Republikës së Maqedonisë së Veriut në Bashkimin Evropian. fb/