Bejrut, 14 nëntor 2024 (MIA) - Të paktën nëntë persona humbën jetën sot, ndërsa pesë janë plagosur në Libanin lindor, kur një sulm ajror izraelit qëlloi një ndërtesë në qytetin Baalbek.

Armata izraelite ende nuk e ka komentuar sulmin, i cili ishte kryer pa paralajmërim. Tani për tani nuk dihet se cili ishte qëllimi i sulmit.

Aeroplanët luftarakë izraelitë intensifikuan sot sulmet në Liban, duke synuar zona të ndryshme në jug dhe lindje të vendit, duke përfshirë periferitë e qytetit Tir dhe provincën Nabatie, njoftoi Agjencia Kombëtare e Lajmeve Libaneze.

Në shënjestër të sulmeve izraelite ishin edhe periferitë jugore të Bejrutit, të cilat u bënë më të shpeshta në dy ditët e fundit.

Armata izraelite ka lëshuar një paralajmërim evakuimi për disa lokacione dhe ndërtesa në periferi të Bejrutit.

Armata konfirmoi sulmet e pozitave të lëvizjes libaneze proiraniane Hezbollah në zonën Dahia, duke përfshirë një depo për armë dhe qendra komanduese.

Sipas të dhënave të sotme  të Ministrisë libaneze të Shëndetësisë, numri i të vdekurve nga fillimi i konfliktit me Izraelin më 8 tetor të vitit 2023 arriti 3.365, ndërsa janë plagosur 14.244 persona. Pothuajse 1,2 milionë banorë janë shpërngulur. sa/

Foto: Arkivi i MIA-s