Të gjithë 133 kardinalët arritën në Romë për konklavën për zgjedhje të Papës së re
Romë, 5 maj 2025 (MIA) - Vatikani kumtoi se të gjithë 133 kardinalët nën moshën 80 vjeçare, të cilët kanë të drejtë të marrin pjesë në zgjedhjen e Papës së ri, kanë arritur në Romë përpara konklavës që fillon të mërkurën.
Kardinalët do të mblidhen në Kapellën Sistina në orën 16:30, për të filluar votimin, i cili do të vazhdojë derisa njëri prej tyre të marrë dy të tretat e shumicës dhe të bëhet lideri i ri i 1,4 miliardë katolikëve në botë.
Kardinalët janë vendosur në rezidencën Santa Marta, ku ka jetuar Papa Françesku i ndjerë, i cili vdiq në moshën 88-vjeçare. Vatikani kumtoi se gjatë konklavës, kardinalët duhet të dorëzojnë telefonat e tyre, ndërsa kuzhina në Santa Marta do të përgatisë vetëm ushqime të lehta.
Votimi është i fshehtë dhe një shumicë prej dy të tretash nevojitet për të zgjedhur pasardhësin e Françeskut, një proces që mund të zgjasë disa ditë apo edhe javë. Konklava më e gjatë në historinë e fundit u zhvillua në vitin 1831, kur Papa Gërguri XVI u zgjodh pas më shumë se 50 ditësh, ndërsa më e gjata në shekullin e 20-të zgjati pesë ditë, kur Piu XI u zgjodh në vitin 1922. Dy konklavat e fundit, në vitin 2005 dhe në vitin 2013, zgjatën dy ditë secila, pas çka Benedikti XVI u zgjodh në raundin e katërt, ndërsa Françesku në raundin e pestë të votimit.
Pas çdo dy rrethesh votimi në kapellën Sistina, fletët e votimit të kardinalëve digjen në një furrë të veçantë për të zbuluar rezultatin e votimit para botës së jashtme. Nëse pas votimit nuk zgjidhet papë, fletët e votimit përzihen me fishekë që përmbajnë perklorat kaliumi, antracen (një përbërës i katranit të qymyrit) dhe squfur, për të prodhuar tym të zi. Kur, megjithatë, votimi përcakton një fitues, fletët e votimit përzihen me klorat kaliumi, laktozë dhe kloroform për të dalë tym i bardhë.
Pas votimit të suksesshëm, Papa i sapozgjedhur pyetet nëse e pranon detyrën dhe cilin emri do të zgjedh. Një kardinal i lartë më pas del në ballkonin e bazilikës Shën Pjetri dhe shpall "Habemus Papam" (Kemi Papë), pas çka Papa i ri bekon njerëzit e mbledhur. rq/bsh/
Foto: EPA
