Dibër, 4 mars 2025 (MIA) - Garancitë e dhëna për mbështetjen dhe mbrojtjen e të drejtave të maqedonasve, në përputhje me detyrimet dhe standardet ndërkombëtare për pakicat, duke përfshirë mësimin e gjuhës amtare maqedonase, investime për përmirësimin e kushteve të jetesës në zonat ku ata jetojnë, si dhe mbështetje e AMIE-s në zgjedhjet lokale në komunën e Pustecit, ishin vendimtare që ne të vendosim të jemi pjesë e koalicionit zgjedhor të udhëhequr nga Partia Demokratike, deklaroi për MIA-n Vasil Sterjovski, kryetar i partisë.

"Partia Demokratike e Shqipërisë, gjegjësisht qeveria e saj e cila do të formohet pas fitores së zgjedhjeve, ka premtuar se do të investojë në rrugë dhe infrastrukturë të tjera, arsim, dhe sektorë të tjerë në qarqet e Prespës, Golobërdos dhe Gorës, për të përmirësuar jetën e banorëve të këtyre zonave. Gjithashtu merr përsipër të zhvillojë mësimin në gjuhën maqedonase për nxënësit e bashkësisë maqedonase, kudo që plotësohen kushtet, në përputhje me legjislacionin që rregullon sistemin arsimor në Shqipëri", potencoi ai.

Ky bashkëpunim, theksoi ai, nuk përfundon me zgjedhjet parlamentare, por do të vazhdojë në zgjedhjet lokale të vitit 2027.

"Është dakorduar që PD të mbështesë kandidatin për kryetar të AMIE-s për komunën e Pustecit dhe të emërojë administratorë nga partia jonë në njësitë administrative Trebisht dhe Ostreni në bashkinë Bulqizë, rrethi Golo Bërdo si dhe në njësitë administrative Shishtavec dhe Zapod në komunën e Kukësit", theksoi ai.

Sipas Sterjovskit, gjithçka që është dakorduar është përfshirë në marrëveshjen e bashkëpunimit, midis PD-së dhe AMIE-s për zgjedhjet e ardhshme parlamentare, që do të mbahen më 11 maj.

Në lidhje me përfaqësimin e kandidatëve të AMIE-s në listat e kandidatëve, theksoi se për momentin nuk ka marrëveshje konkrete, por sipas të gjitha gjasave kandidatët e partisë maqedonase do të jenë në listat e hapura në disa nga 12 Njësitë zgjedhore.

Koalicioni zgjedhor i drejtuar nga PD-ja përbëhet nga 26 parti politike dhe motoja është "Aleanca për Shqipërinë e Madhe".

Në zgjedhjet e fundit parlamentare, AMIE ishte në koalicion me Partinë Socialiste aktuale në pushtet të Edi Ramës. rq/

Foto: MIA