Londër, 16 janar 2024 (MIA) - Partia Konservatore e kryeministrit britanik Rishi Sunak po përballet me një humbje zgjedhore të barabartë me humbjen e bindshme të Partisë Laburiste në vitin 1997, sipas një sondazhi të YouGov të publikuar në gazetën Telegraf.

Përpara zgjedhjeve që priten më vonë këtë vit, sondazhet parashikojnë se laburistët do të fitojnë 385 vende në parlament, ndërsa konservatorët do të mbajnë vetëm 169, duke humbur më shumë vende se në  vitin 1997 kur Toni Bler solli laburistët në pushtet.

Kjo do të përfaqësonte një luhatje prej 11.5 përqind në drejtim të Partisë Laburiste të Kir Starmer, rënia më e madhe e mbështetjes për partinë në pushtet që nga viti 1906, shkruan Telegrafi.

Gjithsej 14,000 njerëz të anketuar nga YouGov është shtatë herë më shumë se numri i zakonshëm i njerëzve të përfshirë në sondazhet e kompanisë.

Hulumtimi është porositur nga një grup donatorësh konservatorë, shkruan Telegrafi.

Sondazhet e fundit tregojnë vazhdimisht se konservatorët janë pas Laburistëve. Një sondazh i YouGov në nëntor tregoi se partia e Sunak është pas laburistëve me 19 pikë përqindjeje.

I pyetur për parashikimin e fundit të një humbjeje të rëndë zgjedhore, Sunak tha se i vetmi sondazh që ka rëndësi janë në fakt zgjedhjet parlamentare që duhet të mbahen deri në janar të vitit 2025, por ai la të kuptohet se ato mund të mbahen gjithashtu në fund të këtij viti. sa/

Foto: EPA