Sisi paralajmëron mbi një përshkallëzim të mundshëm pas përleshjeve mes Libanit dhe Izraelit
- Presidenti i Egjiptit, Abdel Fatah al-Sisi paralajmëron përshkallëzim të mëtejshëm rajonal pas takimit me një gjeneral të lartë amerikan, pasi armiqësitë ndërkufitare mes Izraelit dhe Libanit po intensifikohen.
- Post By Fami Bajrami
- 17:40, 25 gusht, 2024
![Sisi paralajmëron mbi një përshkallëzim të mundshëm pas përleshjeve mes Libanit dhe Izraelit](https://mia.mk/images/20240825174055_big_730x400_77.webp )
Kajro, 25 gusht 2024 (MIA) - Presidenti i Egjiptit, Abdel Fatah al-Sisi paralajmëron përshkallëzim të mëtejshëm rajonal pas takimit me një gjeneral të lartë amerikan, pasi armiqësitë ndërkufitare mes Izraelit dhe Libanit po intensifikohen.
Sisi “paralajmëroi mbi rreziqet e hapjes së një fronti të ri në Liban dhe theksoi domosdoshmërinë e ruajtjes së stabilitetit dhe sovranitetit të Libanit", thuhet në kumtesën e kabinetit të presidentit egjiptian.
Takimi i tij në Egjipt me përfaqësuesin amerikan të Shtatmadhorisë, gjeneralin Çarls Braun, oficeri më i lartë ushtarak i SHBA-së, erdhi disa orë pasi Izraeli filloi sulmet ajrore në Liban.
Izraeli kumtoi se ka penguar sulmin në territorin e saj nga grupi i armatosur libanez Hezbollah, duke nxitur frikën e tensioneve më të gjera rajonale.
Vizita vjen në kohën e bisedimeve të planifikuara në Kajro ku do të marrë pjesë shefi i CIA-s, Uiliam Bërns, qëllimi i të cilit është armëpushim në Rripin e Gazës që duket se është gjithnjë më pak e mundshme, bëjnë të ditur mediat amerikane.
Sisi bëri thirrje për një "qëndrim të vendosur nga bashkësia ndërkombëtare" dhe përgjigje më të fuqishme "për përpjekjet e përbashkëta mes Egjiptit, SHBA-së dhe Katarit" për armëpushim dhe shkëmbim të pengjeve dhe të burgosurve, gjë që do të krijojë "rrugën drejt stabilitetit në rajon”, kumtoi kabineti i tij.