Shkup, 16 tetor 2025 (MIA) – Zhvillimi i qëndrueshëm do të jetë postulati kryesor mbi të cilin do të gjenerohet plani i ri urbanistik për Shkupin, përmes rritjes inkluzive, infrastrukturës elastike, hapësirave publike të qasshme, transportit efikas dhe planifikimit participues. Këtë e tha Kaja Shukova, kandidate për kryetare të Shkupit nga radhët e LSDM-së dhe koalicionit, duke prezantuar vizionin për zhvillimin urban të qytetit në vitet e ardhshme.

Shukova në fjalimin e saj para qytetarëve në konferencën e sotme për shtyp, theksoi se angazhimi strategjik në programin e saj për Shkupin është të sigurojë kushte njerëzore për jetesë, përdorim të qëndrueshëm të hapësirës, ​​rritje të vlerës së saj dhe forcim të integrimit social të banorëve të qytetit.

Ajo tha se problemi i zgjerimit të pakontrolluar të ndërtimeve do të tejkalohet duke u përqendruar në ndërtimin e hapësirave të reja banesore në veri të lumit Vardar, disa prej tyre në lagjet ekzistuese substandarde.

Ajo e sheh zgjidhjen në tejkalimin e problemeve të trafikut përmes ndryshimit të prioriteteve, duke i vënë këmbësorët dhe çiklistët në plan të parë, duke projektuar rrugë dhe bulevarde të reja në pjesën veriore të qytetit të cilat do të lehtësojnë bërthamën qendrore të qytetit e cila do të transformohej në një zonë për këmbësorë.

“Një nga qëllimet tona strategjike është të krijojmë zonë të sigurt dhe të rehatshme për çiklistët. Shtigjet e biçikletave duhet të jenë pjesë integrale e çdo rikonstruimi ose ndërtimi të një bulevardi të ri", tha ajo.

Foto: MIA