Uashington, 4 prill 2025 (MIA) - Shtetet e Bashkuara të Amerikës e kanë ndërprerë kontratën për shërbime satelitore për transmetimin e "Radios Evropa e Lirë/Radio e Lirë" (REL/RL)) në territorin e Rusisë dhe rajonin përreth, tha mbrëmë Stiven Kapus, drejtor ekzekutiv i mediumit.

Bllokada është pjesë e urdhrit të presidentit Donald Tramp për mbylljen e Agjencisë Amerikane për Media Globale (USAGM), e cila financoi Radion Evropa e Lirë.

"Sot erdhëm në punë dhe pamë që USAGM kishte fikur shërbimet satelitore që mbulonin territorin e Rusisë", tha Kapus, raportuan disa nga mediat perëndimore.

Kjo i referohet kanalit televiziv 24-orësh "Nastojashçe Vremja" (Koha aktuale), i cili transmetohet në rusisht në Rusi, Ukrainë, Azinë Qendrore, Evropën Lindore dhe rajone të tjera. Sipas Kapus, USAGM informoi mediumin se kontratat e transmetimit satelitor të kanalit në Evropë janë ndërprerë.

Kapus vuri në dukje se REL/RL ka mënyra të tjera për të arritur audiencën ruse.

"Por... ky nuk ishte një veprim i Qeverisë ruse. Ky është një urdhër nga USAGM, tha ai. Ai beson se administrata e Trampit "do të donte të na mbyllte".

Puna e REL-së u pezullua më 15 mars, pasi u ndërpre granti federal që financonte edicionin. Ky vendim pasoi dekretin e presidentit të SHBA-së për likuidimin e agjencisë (nën të është edhe "Zëri i Amerikës") dhe gjashtë media të tjera. Tramp kërkoi "likuidimin maksimal të komponentëve dhe funksioneve antikushtetuese" të këtyre organizatave dhe një reduktim të ndjeshëm të stafit të tyre. Pak ditë më vonë, REL mori një vendim gjykate për ndalimin e përkohshëm të grantit, ndërkohë që Zëri i Amerikës nuk po punon për momentin.

Keri Lejk, këshilltare e drejtorit të USAGM, tha javën e kaluar se vendimi për të pezulluar financimin e Radios Evropa e Lirë është anuluar. sa/

foto: Arkivi i MIA-s