Bruksel, 1 mars 2024 (MIA) - Devijimi nga Marrëveshja e Gjelbër Evropiane dhe ajo që është arritur deri më tani për çështjet klimatike dhe mjedisore do të ishte fatkeqësi jo vetëm për natyrën, por edhe për ekonominë, thotë kandidatja kryesor të Gjelbërve evropianë për zgjedhjet për Parlamentin Evropian në qershor të këtij viti, eurodeputetja aktual gjermane Teri Rajntke, në një intervistë për Rrjetin Evropian të Lajmeve (ENR), pjesë e të cilit është edhe MIA.

“Nëse në Parlamentin e ardhshëm Evropian, me një shumicë ndryshe, do të ketë një ndryshim të papritur, kjo do të ishte një katastrofë ekonomike. Kjo do të dërgonte një sinjal se ne nuk jemi seriozë, se nuk kemi një kurs të qartë se ku duam të shkojmë. Nga perspektiva klimatike, por edhe nga një perspektivë ekonomike, ne duhet të sigurojmë që të vazhdojmë dhe madje zgjerojmë Marrëveshjen e Gjelbër dhe të sigurojmë investime për të zbatuar dhe arritur qëllimet tona”, thotë Rajntke.

Ajo thekson se nëse politikanët duan të jenë realistë dhe të përgjegjshëm, duhet të përmbushin premtimet që bëjnë.

“Gjatë këtij Legjislativi janë realizuar shumë premtime dhe janë miratuar shumë ligje. Në legjislaturën e ardhshme ne duhet të sigurohemi se do t’I realizojmë këto”, shton Rajntke.

 Sipas saj, edhe pse Komisioni aktual Evropian filloi zbatimin e një programi që e vendosi shumë qartë Evropën në rrugën drejt neutralitetit klimatik, megjithatë, në një vit e gjysmë të kaluar, ndodhën ndryshime që ngadalësuan ambiciet e saj të gjelbra, veçanërisht pasi që Partia Popullore Evropiane "u kthye kundër kryetares së vet të Komisionit", Ursula fon der Layenit.

 

“Pra, ka pasur një drejtim të saktë që u formësua në fillim, por tani pyetja është nëse kjo do të vazhdojë edhe në mandatin e dytë nëse Ursula fon der Lajen zgjidhet sërish Kryetare e Komisionit? Do të varet shumë nga partnerët që do të formojnë shumicën, thotë Rajntke, duke theksuar se kusht për përfshirjen e të Gjelbërve në mazhorancën apo shumicën e Parlamentit Evropian do të jetë vazhdimi i zbatimit të Marrëveshjes së Gjelbër Evropiane.

Ajo thekson se të Gjelbrit kanë qenë deri më tani një "pjesë shumë konstruktive e shumicës" në Parlamentin Evropian dhe gjithmonë kanë deklaruar paraprakisht në mënyrë transparente se si do të votojnë për propozime të caktuara, duke theksuar se "zgjerimi i Marrëveshjes së Gjelbër" do të të jetë kyç për mbështetjen e tyre eventuale për rizgjedhjen e Fon der Lajenit. 

“Kontrata e gjelbër është e lidhur ngushtë me investimet... Do të duhen investime në infrastrukturë, për rindërtim, për transformimin e gjelbër të kompanive. Ky do të jetë çelësi për ne, së bashku me zbatimin e një tranzicioni të drejtë shoqëror. Ne ende nuk i kemi bërë detyrat e shtëpisë në masën që do të donim t'i shihnim të kryera”, thekson Rajntke. 

Sipas saj, kusht për mbështetjen e rizgjedhjes së Fon der Lajenit nga të Gjelbrit do të jetë që asnjë parti e ekstremit të djathtë të mos përfshihet në mazhorancën e re në asnjë formë. 

“Ne kemi nevojë për një angazhim të qartë për sundimin e ligjit dhe demokracisë. Nëse EPP do të përpiqej, për shembull, të përfshinte Konservatorët dhe Reformistët Evropianë (ECR) në koalicion ose në mazhorancë, do të ekzistonte një rrezik shumë i madh për të ndryshuar arritjet e legjislaturës aktuale ose të paktën për t'i vënë ato në pritje dhe për të mos vazhduar zbatimin e tyre. Kjo do të ishte një çështje kyçe për të mbështetur Ursula fon der Lajenin në legjislaturën e ardhshme”, thotë Rajntke, duke shtuar se përpara se të votojnë për rizgjedhjen e saj të mundshme dhe të bëhen pjesë e shumicës, të Gjelbrit do t'i kërkojnë kryetares aktuale të Komisionit Evropian një marrëveshje me shkrim për disa çështje kyçe. 

 

Sipas Rajntkes, disa nga debatet mbi çështjet e gjelbra bazohen në dezinformata dhe pretendime populiste kryesisht nga partitë e djathta ekstreme dhe autoritare të krahut të djathtë, por që ndonjëherë EPP-ja "bie në këtë kurth".

“Mendoj se ka një rrezik real nëse nuk kemi një shumicë demokratike pro-evropiane në Parlamentin e ardhshëm Evropian. Jo vetëm që do të ngadalësonin Marrëveshjen e Gjelbër, por një pjesë e progresit do të ndryshonte - me të gjitha pasojat që do të vijonin. Kjo do të ishte katastrofike për Evropën”, thotë Rajntke. 

Lidhur me paralajmërimin e saj në kongresin e fundit të të Gjelbërve Evropianë në Lion për rrezikun e një "vale të ekstremit të djathtë në politikën evropiane", Rajntke thotë se Evropa nuk ka pasur një të djathtë ekstreme të fortë për një kohë të gjatë, por tani ekziston një kërcënim i Rritjes së mëtejshme të kësaj në zgjedhjet evropiane, që sipas saj përfaqëson "një zhvillim shumë negativ të ngjarjeve" 

“Zhvendosja në të djathtë nuk është një automatizëm fatal. Kjo është arsyeja pse ne duhet të kemi një strategji të trefishtë: Së pari, të kundërshtojmë idetë e së djathtës ekstreme për urrejtjen, ndarjen dhe nxitjen e grupeve të ndryshme të shoqërisë kundër njëri-tjetrit. Si të Gjelbër, ne do të jemi shumë të vendosur në këtë dhe kemi një qëndrim shumë të qartë këtu. Së dyti, dhe këtë e pamë së fundmi në Gjermani, duhet t'u kujtojmë partive konservatore dhe liberale se votuesit nuk do ta vlerësojnë faktin që duan t'i japin fund praktikës së izolimit të së djathtës ekstreme në Parlamentin e ardhshëm Evropian. Ne duhet t'u kujtojmë atyre se sa e rëndësishme është të kemi një pikëpamje shumë të qartë se kush merr vendime pro-evropiane demokratike dhe kush jo. Dhe së fundi, e pamë këtë veçanërisht në rastin e Spanjës - duhet t'i kundërvihemi ekstremit të djathtë, duke u siguruar në të njëjtën kohë të flasim për alternativën e saj. Pasiguria e madhe mes qytetarëve është e kuptueshme: kemi rritur kërcënimet ndaj rendit botëror, inflacionit, njerëzit po luftojnë për të përballuar jetesën... Unë dua të jap përgjigje për betejat e tyre të jetës së përditshme, kjo është ajo që me të vërtetë dua të sjell në këtë fushatë zgjedhore”, thekson Rajntke. 

Kur bëhet fjalë për protestat e fermerëve dhe kërkesat e tyre për të "liruar" disa rregulla dhe norma mjedisore, Rajntke thotë se lëvizja bujqësore është e përhapur me shumë grupe të ndryshme, disa prej të cilave janë të radikalizuar dhe disa "madje të shtyrë nga e djathta ekstreme". 

 

“Por ka edhe shumë fermerë në rrugë, njerëz që punojnë në ferma, që kanë probleme të dukshme, probleme ekonomike, për të cilat Bashkimi Evropian duhet të kujdeset. Ne kemi nevojë për një dialog të strukturuar për të dëgjuar këto shqetësime aktuale dhe për të gjetur përgjigje për to. Unë vetëm dua të bëj të qartë një gjë: në debat shumë shpesh, konflikti tani është i kornizuar sikur fermerët janë kundër Marrëveshjes së Gjelbër. Në realitet, gjendja e vështirë e fermerëve në Evropë nuk ka evoluar në pesë vitet e fundit. Në 15 vitet e fundit, më shumë se një e treta e fermave në Evropë duhej të mbylleshin, shumë kohë përpara se të flitej për Marrëveshjen e Gjelbër në politikën kryesore”, shton Rajntke .

Prandaj, sipas saj, duhet parë se çfarë nuk shkon me politikën bujqësore evropiane për të hequr presionin mbi fermerët dhe për t'u mundësuar atyre të mbijetojnë në mënyrë të qëndrueshme, por edhe për të pasur masa për mbrojtjen e diversitetit biologjik dhe klimës.

“E gjithë kjo është e mundur, por ne duhet të ndryshojmë mënyrën se si e zhvillojmë politikën bujqësore në nivel evropian”, shton Rajntke.

Lidhur me propozimet për vendosjen e postit të Komisionerit Evropian për Mbrojtjen, Rajntke thotë se vetëm kjo pozitë nuk do ta kryejë punën, por se BE-ja duhet të ndryshojë qëndrimin e saj përsa i përket sigurisë dhe mbrojtjes. 

“Problemi nuk është Parlamenti Evropian dhe jo domosdoshmërisht Komisioni. Varet nga shtetet anëtare dhe vullneti i tyre për të përmbushur detyrimet e tyre... Kjo është diçka që duhet ta ndryshojmë. Vendet anëtare duhet të kuptojnë se nëse duan të investojnë në një strategji afatgjatë sigurie, duhet ta bëjnë këtë në Evropë. Por edhe nëse duan të investojnë në mënyrë efektive, ata duhet ta bëjnë atë në një mënyrë evropiane dhe të jenë të koordinuar reciprokisht”, thotë Rajntke . 

Sipas saj, i gjithë debati për mbrojtjen dhe sigurinë nuk mund të përfundojë vetëm me diskutime për shpenzimet e mbrojtjes. 

  

“Nëse duam të kemi një strategji afatgjatë sigurie, duhet të flasim për qeverisjen dhe faktin që tani në politikën e jashtme dhe të sigurisë kemi votim me konsensus në Këshill, kështu që njerëz si (Kryeministri hungarez) Viktor Orban në thelb mund të vendosë veton për gjithçka”, thekson lideri i të Gjelbërve evropianë.

Ajo thekson se në fakt Marrëveshja e Gjelbër nuk është vetëm një politikë klimatike, por edhe një politikë sigurie, sepse nëse BE-ja nuk dëshiron të varet më nga diktatorët si presidenti rus Vladimir Putin, duhet të reduktojë importin e lëndëve djegëse fosile, të rrisë burimet e rinovueshme të energjisë dhe të vendoset një sistem më i organizuar i gazsjellësve.

Rajntke thotë se në zgjedhjet e ardhshme evropiane të Gjelbrit presin një përsëritje të “rezultatit të mirë” të vitit 2019, me një rritje të diversitetit gjeografik të grupit parlamentar.

“Në vitin 2019 vala e gjelbër preku më së shumti veriun dhe perëndimin e Evropës dhe tani po punohet për ta zgjeruar atë në jug dhe në lindje”, thotë Rajntke, duke bërë të ditur se për këtë qëllim do të fokusohen në çështjet që janë aktuale në vendet e Evropën Jugore dhe Lindore.

Në lidhje me konsolidimin e mundshëm të grupit parlamentar të të Gjelbërve në Parlamentin Evropian duke u bashkuar me Lëvizjen Italiane Pesë Yjet (M5S) dhe Federatën Spanjolle Të bashkuar (Sumar), Rajntke thotë se kanë zhvilluar bisedime me italianët, por tani për tani "nuk ka zhvillime të reja", ndërsa në lidhje me koalicionin nga Spanja, shprehu shpresën se nga përbërja e tij në zgjedhje do të dalë një "deputet i gjelbër".

Sashko Panajotov

Foto: ENR/Të Gjelbërit Evropianë