Gazë, 12 tetor 2025 (MIA) - Kalimi kufitar Rafah midis Egjiptit dhe Rripit të Gazës pritet të rihapet për civilët javën e ardhshme, raportoi DPA, duke cituar disa burime.

 Burime palestineze bënë të ditur se objekti do të hapet zyrtarisht për qarkullim të këmbësorëve të martën. Autoriteti Palestinez, së bashku me misionin e Bashkimit Evropian, do të menaxhojë anën palestineze të kalimit, shtuan burimet.

Ndërkohë, një burim sigurie egjiptiane tha se po koordinohet me të gjitha palët për të rihapur kalimin të martën me qëllim transportimin e të plagosurve dhe të sëmurëve nga Rripi i Gazës dhe mundësimin e hyrjes për ata që kanë mbetur të bllokuar në Egjipt. 

 Burime izraelite të sigurisë theksuan se kushdo që hyn ose del nga Rripi do t'i nënshtrohet miratimit izraelit.

Të premten, ministri italian i Mbrojtjes, Gvido Krozeto, deklaroi se kalimi i Rafah do të rihapet në të dyja drejtimet të martën, në përputhje me planin e paqes për Gazën të presidentit amerikan Donald Trump. 

Kalimi u rihap për një kohë të shkurtër gjatë një armëpushimi në janar që më vonë dështoi. Izraeli mori kontrollin e anës palestineze të objektit në një ofensivë në maj të vitit të kaluar, duke thënë se dëshironte  të parandalojë lëvizjen militante palestineze Hamas të kontrabandonte armë në Gazë përmes tuneleve kufitare. 

 Javën e kaluar, Izraeli dhe Hamasi arritën një marrëveshje armëpushimi dhe lirimi të pengjeve, e cila shihet si një përparim në përfundimin e luftës shkatërruese dyvjeçare.

Egjipti ka pohuar vazhdimisht se po e mban të hapur kalimin kufitar në anën egjiptiane dhe e ka akuzuar Izraelin për ndërprerjen e shpërndarjes së ndihmave në Rripin e Gazës me popullsi të dendur. 

Foto: Arkivi