Bruksel, 3 prill 2025 (MIA) - Indekset evropiane të bursave ranë sot pasi që presidenti amerikan Donald Tramp vendosi tarifa reciproke në më shumë se 180 vende dhe territore në mbarë botën, duke përfshirë një tarifë prej 20 për qind për mallrat e importuara nga Bashkimi Evropian dhe 10 për qind për mallrat nga Britania.

Administrata e Trampit e cila e ka shpallur 2 Prillin "Ditën e Çlirimit", gjithashtu ka vendosur tarifa 25 për qind për të gjitha importet e makinave të prodhuara nga jashtë, transmeton Si-En-Bi-Si.

Sipas presidentit amerikan, ajo datë "do të mbahet mend përgjithmonë si dita kur industria amerikane u ringjall".

Bursa e Frankfurtit DAX sot në orën 9:30 ra në 21.868,05 pikë, FTSE britanike 100 në 8.488,95 pikë, CAC franceze 40 në 7.681,67 pikë, ndërsa MOEX i Moskës u rrit në 2.946,28 pikë.

Aksionet e shumë kompanive evropiane sot po bien. Puma e Gjermanisë ra me nëntë për qind, Adidas me 8,6 për qind, Volvo e Suedisë me nëntë për qind, ndërsa kompania daneze e anijeve Maersk me 7,4 për qind, publikoi Si-En-Bi-Si.

Vlera e indeksit amerikan të bursave Dou Xhonus u rrit në 42.225,32 pikë në mbylljen e djeshme, indeksi CdheP 500 ra në 5.670,97 pikë, ndërsa vlera e indeksit Nasdak ra në 17.601,05 pikë.

Sipas të dhënave aktuale të bursës, çmimi i naftës së papërpunuar ra në 69.157 dollarë, ndërsa i naftës Brent në 72.412 dollarë.

Çmimi i arit ra në 3.120.99 dollarë për ons.

Vlera e euros në krahasim me dollarin në bursën Forex është 1.09752, që është më e lartë se vlerat e vërejtura në tregtimin e djeshëm. rq/