Havana, 15 mars 2025 (MIA) - Pothuajse e gjithë Kuba ka mbetur pa energji elektrike pasi rrjeti kombëtar i energjisë elektrike pësoi një defekt të madh mbrëmë, njoftoi Ministria kubane e Energjisë dhe Minierave. Sipas autoriteteve, problemi u shkaktua nga një defekt në nënstacionin kryesor në Havana, i cili çoi në një ndërprerje të furnizimit me energji elektrike në pjesën më të madhe të Kubës perëndimore, përfshirë kryeqytetin.  

Dëshmitarët raportuan se Havana ishte plotësisht në errësirë, me përjashtim të disa hoteleve që punonin me gjeneratorë. Raportimet në rrjetet sociale tregojnë se si rajonet lindore dhe perëndimore të vendit, me një popullsi prej 10 milionë banorësh, u prekën nga ndërprerja e energjisë elektrike.

Kjo është një goditje tjetër për rrjetin e brishtë dhe të vjetëruar të energjisë të Kubës, i cili është përballur prej kohësh me ndërprerje të shpeshta. Fundi i vitit të kaluar u shënua me paqëndrueshmëri në furnizimin me energji elektrike për shkak të mungesës së karburanteve, fatkeqësive natyrore dhe krizës ekonomike.

Ndërprerjet me orë të tëra të energjisë elektrike janë bërë një dukuri e përditshme për kubanezët, të cilët gjithashtu po përballen me mungesa të rënda ushqimore, ilaçesh dhe ujit. Gjithnjë e më shumë banorë të ishullit po vendosin të migrojnë, duke kërkuar një jetë më të mirë jashtë Kubës. ls/

Foto: EPA